A crise socialista tensa aínda máis as relacións entre PSdeG e as mareas

Durante a campaña electoral houbo pacto de non agresión, pero pasados os comicios as tensións entre o PSdeG, por un lado, e En Marea as mareas municipalistas, polo outro, volveron saír á luz. O 'sorpasso' de En Marea en número de votos e o empate en escanos no Parlamento galego —ambos os dous partidos teñen 14—, xunto coa crise que atravesa o PSOE, precipitaron nos últimos días accións e declaracións que contribúen a aumentar a tensión entre ambas as partes. No PSdeG, os críticos vense agora fortes para impoñer as súas teses e facerse co control do partido, tras derrocar a Pedro Sánchez en Madrid, e xa deseñan a súa estratexia para reformular as relacións coas mareas. Mentres, En Marea e as súas expresións municipalistas sacan músculo tras converterse na segunda forza política de Galicia e aproveitan ademais a debilidade actual dos socialistas, por mor do cisma que viven, para impoñer os seus criterios.

FERROL, EPICENTRO DA DISPUTA

Todo comezou xusto o día despois das eleccións galegas, cando o alcalde de Ferrol, Jorge Suárez, de Ferrol en Común, decidiu retirarlle competencias a varios edís do PSdeG —socio de goberno—, incluída a súa líder, Beatriz Sestayo. Segundo o rexedor ferrolán, a decisión tomouna ante "a falta de comunicación" con Sestayo e os outros edís afíns a ela, e asegurou que son diferenzas "máis persoais que políticas". Con todo, a ninguén se lle escapou que a decisión fose aplicada o día despois dos comicios, cun PSdeG deprimido e unha En Marea sacando músculo ante os socialistas. Isto levou irremediablemente á ruptura do pacto de goberno nesta cidade e ao primeiro gran fracaso das alianzas entre mareas e socialistas.

Precisamente, Sestayo pertence ao sector socialista crítico con Pedro Sánchez, en Madrid, e con Pilar Cancela, en Galicia, e conta co apoio incondicional do alcalde de Vigo, Abel Caballero, un dos promotores da rebelión en Galicia contra a que era até este pasado sábado a dirección do PSOE e a xestora do PSdeG. Por iso, Caballero non tardou en saír en defensa de Sestayo e atacar a Jorge Suárez. O líder vigués, ex-ministro con Felipe González, mantén unha posición moi dura coas mareas, dende a comodidade que lle dá a maiorìa absoluta coa que goberna en Vigo. Pero non é o único que nestes días se pronunciou abertamente contra o alcalde de Ferrol e contra as mareas municipalistas. Na Coruña, por exemplo, Mar Barcón, secretaria local do PSdeG na cidade herculina, aproveitou a crise de goberno en Ferrol para instar á dirección do PSdeG a "convocar" aos grupos municipais socialistas das tres grandes cidades da provincia "para repensar a relación con Marea Atlántica, Ferrol en Común e Compostela Aberta". Barcón tamén pertence ao sector crítico do PSdeG que agora quere tomar o control do partido en Galicia tras derrocar en Madrid a Sánchez. A líder local do PSdeG na Coruña votou contra os plans de Sánchez no Comité Federal, desoíndo o mandato das agrupacións municipais socialistas da provincia coruñesa, que ao igual que as de Lugo, pediron o apoio ao xa ex-secretario xeral do PSOE.

A división no PSdeG é máis que evidente, non só no que respecta á decisión do Comité Federal en Madrid e ao control do partido en Galicia, senón tamén no que atinxe ás relacións coas mareas. Así, por exemplo, contra o que propoñen os críticos, a executiva do PSOE na provincia da Coruña propuxo esta semana "recompoñer" a situación do grupo municipal socialista en Ferrol, actualmente dividido entre afíns e críticos coa líder local, Beatriz Sestayo, para, a continuación, explorar se existen opcións de manter o pacto de goberno con Ferrol en Común.

REFORMULAR AS RELACIÓNS COAS MAREAS

O sector socialista díscolo está liderado por Abel Caballero, Pachi Vázquez e José Blanco, e nel aparecen nomes como os de Méndez Romeu, Xosé Sánchez Bugallo, María Quintas, José López Orozco, Marisol Soneira, a propia Beatriz Sestayo, Laura Seara ou Bernardino Rama, entre outros. Tras a votación do Comité Federal en Madrid que acabou coa dimisión de Pedro Sánchez, agora vense fortes para botar a Pilar Cancela da xestora que actualmente dirixe o PSdeG. Cancela foi a única dos representantes galegos no Comité Federal socialista que apoiou a Sánchez. Os demais, e malia o mandato dado polas agrupacións socialistas, votaron contra as propostas do xa ex-secretario xeral do PSOE.

Unha vez acadado o control sobre o PSdeG, a súa intención é seguir os consellos dos dirixentes socialistas da Coruña, Ferrol e Santiago para modificar a relación que existe coas mareas e endurecer o discurso contra estas, sobre todo, tras a crise no executivo de Ferrol. Unha situación que pode levar mesmo a presentar mocións de censura en determinados concellos nos que actualmente goberna algunha marea municipalista.

VILLARES METE PRESIÓN

Mentres, do lado de En Marea, vense cada vez máis fortes fronte a un PSOE debilitado, roto e cun futuro incerto. Por iso, non dubidan en amosar músculo ante os socialistas, como fixo primeiro o alcalde de Ferrol e agora, tamén, Luís Villares, o candidato de En Marea á Presidencia da Xunta e líder da oposición para os próximos catro anos no Parlamento galego. 

Aproveitando o cisma socialista, Villares denunciou que o PSdeG "se sitúa na tesitura de facilitar, senón por acción, por omisión, a sensación de ingobernabilidade" dos gobernos das mareas, despois do "mandato claro" de "desaloxar ao PP" que, ao seu xuízo, se expresou nas urnas nas municipais. E é que o líder de En Marea entende que é "posible" establecer "puntos de encontro" para a gobernabilidade do país e das cidades, como xa demostraron as mareas, recalcou, durante o último ano e medio.

Por iso, nunha  entrevista en RNE, solicitou aos socialistas —só un día despois da dimisión de Pedro Sánchez como secretario xeral e da creación dunha xestora encabezada polo presidente de Asturias, Javier Fernández— que sexan "responsables", pois entende que, pola contra, cando cheguen as próximas eleccións municipais "a cidadanía porá a cada un no seu sitio".

Neste sentido, subliñou que os que teñen o poder agora no seo do PSOE apostan por unha vía que En Marea xa denunciou en campaña. "Nós garantimos o fin das políticas de sufrimento, recortes e corrupción do PP", salientou Villares, quen asegurou que "non todo o mundo estaba en disposición de dicir o mesmo con toda a claridade", antes e agora. Segundo o líder de En Marea, e ante o que está acontecendo no PSOE e no PSdeG, agora xa saben que o dito nese momento por En Marea "ten máis sentido que nunca".

"Hai unha corrente no PSdeG que eu espero que sexa minoritaria e que non triunfe, que é a que entende que é bo acabar cos gobernos das mareas, cos gobernos de progreso", denunciou, para logo opinar que se trataría dunha "funesta idea" que "acabaría co PSOE" como "referencia" do espazo que, ao seu xuízo, lle poida quedar na esquerda.

Así mesmo, advertiu de que "En Marea chegou para quedarse" e non teme que ningún deputado se vaia ao grupo mixto, como si sucedeu na lexislatura pasada con parlamentarias de AGE.

Con todo, en En Marea non queren contemplar un escenario de total ruptura cos socialistas, pois saben que, aínda que débiles, seguen sendo socios necesarios tanto para plantar cara a Feijóo no Parlamento galego como para gobernar nalgúns concellos nos próximos anos. Por iso, o alcalde de Ferrol recomendou ao seu homólogo da Coruña, Xulio Ferreiro, integrar o PSOE no seu goberno, iso si, advertíndolle que "aínda que remate en duro sufrimento e retorcéndose de dor".