Por E.P. | Santiago de Compostela | 03/10/2016 | Actualizada ás 20:21
A presidenta da xestora do PSdeG, Pilar Cancela, descartou novamente este luns poñer o seu cargo a disposición do partido e esixiu o mesmo "respecto" e a mesma "lealdade" para o órgano que encabeza que para o recén constituído a nivel federal, pois ten a mesma "lexitimidade" que o liderado polo asturiano Javier Fernández.
En rolda de prensa tras reunirse co resto de integrantes da dirección provisional do PSdeG, non só rexeitou dimitir, senón que, ademais, revelou que na negociación para constituír a xestora federal, na que -asegurou- estivo presente, acordouse "respectar" todas as existentes noutros puntos do territorio.
Trátase, segundo as súas propias palabras, de ser "coherentes" coa mensaxe "de unidade, a sumar e de non incidir máis na división e na fractura". "É a única saída para facer máis forte este partido", esgrimiu a tamén deputada no Congreso.
Así pois, ante as peticións de dimisión de, entre outros cargos, o alcalde de Vigo, Cancela recalcou que seguirá no seu posto para cumprir o mandato que ten encomendado: convocar unhas primarias e un congreso para elixir a nova dirección do PSdeG. "É a función principal desta xestora e estamos dispostos a cumprila", resolveu.
É máis, avanzou que nos próximos días solicitará unha reunión co presidente da xestora federal para abordar as cuestións pendentes en Galicia e coñecer a súa folla de ruta para o PSOE; e que, nesta semana, aproveitará para convocar os 14 deputados electos polo PSdeG para "empezar a traballar".
"EN ABSOLUTO" CUESTIONADA
A preguntas dos xornalistas sobre as voces internas que piden a súa dimisión, manifestou que "en absoluto" se sente "cuestionada".
A xeito de reivindicación do seu traballo, recordou que accedeu ao cargo "nun momento tremendamente difícil e duro", a raíz da dimisión de José Ramón Gómez Besteiro, e cunhas eleccións autonómicas en pendes. Naquel momento, proseguiu, "chamouse a participar a absolutamente todo o mundo", pero algúns optaron por non se sumar.
Tras esta alusión á agrupación de Vigo, a maioritaria en Galicia, censurou que "nalgúns casos, dende o primeiro momento se cuestionou e se debilitou a xestora".
Sen deixar de reclamar "a mesma lealdade" co órgano que preside que co comandado por Javier Fernández, Pilar Cancela aseverou que a xestora do PSdeG "está a disposición de todos" para conducir o partido ata as primarias e o congreso dos que sairá un novo líder e unha nova dirección política.
"ACOSTUMADA" A CABALLERO
Cuestionada acerca das críticas de Abel Caballero, limitouse a expresar o seu "respecto cara ás opinións de todos os militantes" tras 'chancear' con que xa está "acostumada" ás súas reaccións.
"Dende o primeiro momento que foi elixida a xestora, houbo peticións constantes de dimisións", minimizou así o seu impacto, pero, partidaria da "responsabilidade", insistiu en que ela cumprirá co mandato que ten atribuído.
Iso si, saíu ao paso das críticas que o rexedor olívico verqueu sobre o candidato á Xunta, Xoaquín Fernández Leiceaga, para recordarlle que foi a opción que "maioritariamente" avalou a militancia nas primarias.
Polo tanto, advertiu Cancela, "a súa lexitimidade non pode ser cuestionada", máxime cando no PSdeG persiste -apuntou- "a mesma correlación de forzas, ou mesmo maior" no seu favor que cando venceu a José Luis Méndez Romeu, a opción avalada por Caballero.
"Non incidamos máis nas divisións", apelou, antes de enviar á militancia unha mensaxe de "unidade" e de "tranquilidade". "Pasamos situacións complexas, e desta tamén sairemos", concluíu.
POSICIÓN NO COMITÉ FEDERAL
Finalmente, os xornalistas preguntaron a Cancela sobre a súa situación orgánica, á vista de que foi a única integrante da delegación galega no Comité Federal do PSOE do pasado sábado que apoiou o exsecretario xeral.
"Eu entendo que, nun órgano de participación do partido en representación do PSdeG, debo representar a opción maioritaria do partido. Pero é unha opción persoal de cada un", subliñou, en relación aos escritos "dun 80 por cento" das agrupacións da Coruña e Lugo e "dunha porcentaxe relevante" das ourensanas e pontevedresas en favor do calendario proposto por Pedro Sánchez.
"Pero cada un pode defender nos órganos do partido o que considere, eu respéctoo", reiterou a presidenta da xestora, para quen a súa postura está en liña con sentir "maioritario" das bases do PSdeG.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.