A Xunta convoca unha bolsa de formación para titulados superiores no ámbito da I+D+i

A Fundación Galicia Europa convoca, por segundo ano consecutivo e en colaboración coa Axencia Galega de Innovación, unha bolsa de prácticas formativas para titulados superiores universitarios co obxecto de formar a persoa seleccionada na xestión de proxectos europeos no ámbito da innovación e a investigación.

Esta é a segunda convocatoria da bolsa de I+D+i, tras a entrada da Axencia de Innovación no padroado da Fundación en xuño de 2015, o que propiciou unha estreita colaboración entre as dúas entidades.

A bolsa terá unha duración dun ano e desenvolverase integramente na oficina da FGE en Bruxelas, onde a persoa seleccionada se unirá ao equipo de bolseiros da Fundación. Tamén existe a posibilidade de que o seleccionado realice breves períodos formativos nas dependencias da Axencia en Santiago.

O plan de formación consistirá no seguimento das políticas comunitarias relacionadas coa innovación e a investigación e incluirá a asistencia ás reunións das redes de cooperación rexional nas que participa a Xunta.

Aqueles interesados poderán presentar as súas candidaturas, coa documentación esixida, ata o 14 de outubro, mediante o envío por correo certificado ou depositándoa persoalmente en calquera das dúas oficinas da FGE en Santiago e en Bruxelas.