A Armada investiga a suposta presenza de anisakis en pescada na Escola Antonio de Escaño de Ferrol

Integrantes da Xefatura de Sanidade e o Servizo de Veterinaria da Armada en Ferrol están a realizar análise dunha das mostras das porcións de pescada servida o pasado martes, 18 de outubro, durante o xantar na Escola de Especialidades Antonio de Escaño, e que, segundo unha denuncia realizada a través das redes sociais, contiña abundante anisakis.

Por parte da Armada, a través dun comunicado, asegúrase que se están a "seguir as medidas protocolarias establecidas para estes casos" pola Axencia Española de Seguridade Alimentaria e Nutrición. ademais, incidiu en que a pescada, que "tras a manipulación inicial aparentaba fresca e de boa calidade, foi cociñada cumprindo as recomendacións" desa mesma axencia no relativo á prevención da anisaquíase.

Segundo alega a Armada, "ata a data non se detectou ningún caso de impacto clínico, problemas dixestivos, urticaria, anafilaxia, suxestivo de infestación" por anisakis.

DENUNCIA NAS REDES SOCIAIS

Foi a través do perfil de Facebook 'Cidadáns de Uniforme' onde se denunciou esta situación, o que motivou máis de 190 comentarios de todo tipo, dende detractores da comida servida na escola militar a outros que destacan a súa calidade.

Ademais, a denuncia aparece co acompañamento de varias fotografías supostamente feitas aos menús servidos. Fontes consultadas estiman que o anisakis atopouse en sete das trescentas porcións servidas.

Así mesmo, algúns dos alumnos aseguraron que as instantáneas poderían ser retocadas para magnificar a situación.