Javier Gómez Noya recibe este venres o Princesa de Asturias dos Deportes 2016

O triatleta galego Javier Gómez Noya, cinco veces campión do mundo, recibirá este venres no Teatro Campoamor de Oviedo, o Premio Princesa de Asturias dos Deportes 2016.

O deportista ferrolano, subcampión olímpico en Londres, impúxose o pasado mes de xuño na votación á esquiadora Lindsey Vonn, o piloto de rallys Sebastien Loeb e aos 'All Blacks' de rugby, grazas ao seu "esforzo e perseveranza ante a adversidade, demostrando unha enorme fortaleza e un encomiable espírito de superación en toda a súa carreira", segundo ditaminou o xurado.

Nacido o 25 de marzo de 1983 en Basilea (Suíza), onde traballaban os seus pais, tras comezar a destacar na natación, debutou en 1998 nun triatlón en Castropol (Asturias) onde finalizou segundo na categoría xuvenil.

Dende entón a súa carreira neste deporte foi imparable cuns históricos cinco títulos mundiais e a medalla de prata nos Xogos Olímpicos de Londres, a primeira dun español nesta disciplina, malia as trabas burocráticas que tivo que salvar tras serlle detectada unha cardiopatía.

O deportista galego, que xa estivo entre os candidatos ao premio o ano pasado cando recaeu nos irmáns Pau e Marc Gasol, era un dos favoritos ao ouro olímpico nos Xogos de Río de Janeiro, pero unha inoportuna caída a semanas da cita apartouno da posibilidade de sumar a súa segunda medalla.

"Este premio é agradecemento a unha traxectoria con moitos obstáculos no camiño. Este ano foi difícil, pero hai que sobrepoñerse e xa penso na próxima tempada que espero sexa exitoso", recalcou o triatleta este mércores en Oviedo.