Traballadores de Isolux protestan ante o Parlamento contra o cuarto ERE, que suporá 32 despedimentos en Galicia
O voceiro da asemblea rexeita que a compañía alegue perdas e reivindica ser un equipo "rendible e produtivo"
SANTIAGO DE COMPOSTELA | 21/10/2016 | Actualizada ás 11:27 por EUROPA PRESS
Traballadores de Isolux-Corsan protestaron este venres ante o Parlamento de Galicia, coincidindo coa sesión de constitución da Cámara, contra o expediente de regulación de empresa (ERE) que formula o grupo, e que suporá, de acordo coas previsións da compañía, 32 despedimentos na comunidade galega, dun equipo de 42 persoas.
En declaracións a Europa Press, o voceiro da asemblea de traballadores de Galicia, Raúl Vermellas, rexeitou "rotundamente" as causas económicas que alega a construtora para acometer este novo axuste, ao destacar que as obras "importantes" e "de todo tipo" que se realizaron na comunidade galega -- entre elas, recentemente, a da depuradora de Lagares en Vigo e a fábrica de tabaco en A Coruña-- "non entraron en perdas".
"O problema é que son perdas derivadas de operacións financeiras de contratos feitos no estranxeiro", criticou, antes de censurar que se"estean a repercutir" eses custos "para xustificar un ERE" a un equipo que "xa tivo os seus recortes", no seu día motivados pola baixada de actividade na construción.
Neste sentido, os traballadores de Isolux-Corsan reivindican ser un equipo "produtivo e rendible", e advirten de que a súa postura na mesa de negociación -- que, en teoría, ten que rematar as súas reunións a semana que vén -- vai seguir sendo de "non ao ERE".
ÁS portas do Pazo do Hórreo achegáronse deputados de distintos grupos para mostrar o seu apoio aos traballadores, que corearon consignas e mostraron pancartas en contra do ERE.
"DESCAPITALIZACIÓN"
A maiores, sobre o contexto no que se move a compañía, Vermellas recordou que á fronte da dirección da empresa estaba ata fai pouco Luis Delso, "inmerso en distintos procesos xudiciais" -- no xuízo da trama 'Gürtel', Francisco Correa desvelou que 'Luis el Cabrón' era Luis Delso, expresidente de Isolux--.
Por iso, fíxose cargo a banca, liderada polo Santander,", á que acusou de estar "facendo un lavado de cara da empresa para vendela", nunha especie de "descapitalización".
