A Escola de Arte Mestre Mateo celebra na Cidade da Cultura a sétima edición do seu desfile 'Despunte'

A Escola de Arte e Superior de Deseño Mestre Mateo celebrará este venres, día 4, a sétima edición do seu desfile 'Despunte' na Cidade da Cultura, en Santiago de Compostela.

Segundo informou a escola, o obxectivo deste desfile é difundir o talento e saber facer do alumnado entre as persoas, empresas e institucións relacionadas co mundo da moda, a xoiaría, o deseño e a arte en xeral.

Baixo o título 'Despunte', desfilarán os traballos finais de estudios das ensinanzas superiores de Deseño de moda, que darán paso, co nome de 'Miscelánea', aos traballos do terceiro curso das ensinanzas superiores de Deseño de moda. Por último, poderán verse os traballos finais do alumnado do Ciclo Superior de Xoiaría Artística.