CIS.- En Marea mantén a estimación de voto do 26J e todas confluencias con Podemos darían o 'sorpasso' ao PSOE

A confluencia de En Marea --que ás eleccións xerais se presentou nas dúas últimas ocasións como coalición electoral-- mantería unha porcentaxe de voto similar ao obtido o pasado 26 de xuño e, xunto ao resto de confluencias nas que participa Podemos e a propia coalición Unidos Podemos, darían o 'sorpasso' ao PSOE, segundo se desprende do Barómetro de Opinión do mes de outubro que se coñeceu este luns.

A enquisa realizouse a principios de outubro, xusto despois do convulso Comité Federal do PSOE do día 1 que acabou coa dimisión do daquela secretario xeral do partido, Pedro Sánchez.

Segundo a sondaxe, o PP supera a súa porcentaxe das eleccións xerais do mes de xuño e distánciase dos demais. Así, deixa a 12,7 puntos a Unidos Podemos e as súas confluencias de Cataluña, Galicia e Comunidade Valenciana e a 17,5 puntos aos socialistas, que marcan o seu peor dato dos últimos anos. Ciudadanos pola súa parte, queda no 12,8 por cento.

No caso de En Marea, a sondaxe dálle unha estimación de voto do 1,6 por cento, moi similar ao que lle outorgou na enquisa preelectoral de xuño, cando o mantivo no 1,7 por cento e sete deputados. Finalmente, en xuño a coalición de Anova, Podemos e Esquerda Unida obtivo un 1,44 por cento dos sufraxios e cinco deputados, un menos que nas eleccións do 20 de decembro de 2015.

(HABERÁ AMPLIACIÓN)