A UVigo outorga o Premio Egeria a 6 traballos que abordan a perspectiva de xénero en ámbitos como os piropos e contos

A Universidade de Vigo (UVigo) outorgou os seus Premios Egeria á Inclusión da Perspectiva de Xénero a un total de seis traballos de fin de grao e máster, que versan sobre os piropos, a rotura da heteronorma, o alumnado transexual, a mirada feminina no cinema, a incorporación da muller rural á vida profesional e os estereotipos de xénero nos contos de fadas.

Tal e como comunicou a institución académica, a esta terceira edición destes galardóns presentáronse 27 traballos de egresados dos tres campus, dos cales 20 son de ámbito xurídico-social, seis de artes e humanidades e un científico-tecnolóxico.

Trátase dunha convocatoria que, segundo a directora da unidade de Igualdade da UVigo, Anabel Penín, "se está a consolidar como unha forma de recoñecemento da importancia de introducir a perspectiva de xénero" nos traballos universitarios.

Entre os premiados atópanse o traballo sobre os 'Piropos: Gozados ou rexeitados pola mocidade?", de Raquel Lois Gómez; 'A rebeldía de querer ser eu: ser unha persoa diversa nun mundo heteropatriarcal', de Rebeca Jorge Rodríguez; e 'Diversidade de xénero e alumnado trans', de Martín Rodríguez.

Así mesmo, inclúese 'A construción da "mirada feminina" como unha alternativa no cinema', de María Ortega; o proxecto piloto 'conectadas', que consiste no deseño dunha estratexia de incorporación da muller rural á vida profesional, de Raquel Jares; e 'Fairy tales of the 21 st century: The reinterpretation of gender roles in Maleficent', de Estrela Rivas.