Por Galicia Confidencial | Santiago de Compostela | 10/01/2017 | Actualizada ás 18:24
O Comité de Defensa das Rías Altas e un veciño afectado da Laracha presentaron unha denuncia ante a Fiscalía Provincial de Medio Ambiente e Urbanismo en Santiago de Compostela pola construción dun campo de tiro olímpico no lugar de Vilar de Fraga, Soandres, no municipio larachés.
A denuncia alerta de que a instalación conleva o levantamento dunha nave de 3,5 metros de altura que os denunciantes entenden que "non é susceptible de autorización" por diversas razóns.
En primeiro lugar, argúen que o campo de tiro instátase nunha fraga de 8,5 hectáreas de superficie, situada á beira do río Anllóns, onde varias árbores centenarias foron taladas, alterando a configuración do terreo. A asociación subliña que a fraga é "especialmente valiosa", con "árbores autóctonas e arredor de setenta especies animais protexibles". Na denuncia, deféndese que "nin a construción desenvolvida nin a actividade que se pensa desenvolver ao aire libre é compatible cos valores propios do terreo nin a súa protección xurídica".
Ademais, en segundo lugar argúen que se trata dun terreo polo que pasa un antigo camiño real, documentado xa polo Marqués da Ensenada no século XVIII e no que se atoparon restos romanos e tumbas de datación incerta.
Por último, os denunciantes sinalan que por alí tamén pasa un camiño público municipal "desafectado recentemente por razóns que non entendemos", din, e que se atopa ao carón dunha estrada, o cal entra en "plena contradición coa normativa de armas", supoñendo un "risco para os veciños do lugar". Ademais, alertan da posible contaminación por chumbo na ría na que desemboca o Anllóns polo uso de armas.
Segundo comunicaron a GC fontes da denuncia, o fiscal consefou aos afectados que nese lugar "non se podían facer estas obras e a prevista do tiro ao prato" e "viu bastantes cousas mal", polo que "vai intervir, investigar e tomar medidas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.