O avogado do exalcalde do Grove José Alfredo Bea presentará unha querela por calumnias contra o autor de 'Fariña'

O avogado do exalcalde do muncipio pontevedrés do Grove entre 1983 e 1991 José Alfredo Bea Gondar, Rogelio Turrado, asegurou que presentará en próximos días unha querela por un delito de calumnias contra o autor do libro 'Fariña', o xornalista e escritor Nacho Carretero.

Así o manifestou, en declaracións a Europa Press, tras o acto de conciliación sinalado para este mércores no Xulgado de Primeira Instancia número 82 de Madrid, ao que non asistiu o xornalista e escritor nin o seu avogado, senón que estivo representado por un procurador cun poder para "mostrar que non hai avinza", segundo concretou o letrado.

Por iso, Turrado comentou que se porá a traballar no contido da querela por "un delito de calumnias" cara a o seu representado polas afirmacións no libro nas que atribúe ao exalcalde a comisión de feitos delituosos relacionados co narcotráfico galego polos que foi "totalmente absolvido" polo Tribunal Supremo en 2006, segundo recorda.

Deste modo, o avogado Rogelio Turrado trasladou a súa intención de presentar nos xulgados madrileños a querela "á maior brevidade" por un delito de calumnias.

MEDIDAS PREVENTIVAS

Así mesmo, o avogado de Bea Gondar explicou que pedirá ao xulgado como medida preventiva, por un lado, o "secuetro" da publicación 'Fariña' obxecto da demanda.

Tamén solicitará que, de forma preventiva, "non se emita" a serie sobre esta novela "ata que se desvele se as imaxes poden lesionar" o dereito do seu cliente.

Preguntado sobre o asunto relativo ao acto de conciliación tras a denuncia do exalcalde do Grove, Nacho Carretero declinou facer declaracións sobre este tema.