A Xunta e o CSIC colaboran para estudar a resposta inmune da ameixa vermella ante o cambio climático
O proxecto RIFA desenvolverase ata 2027 co apoio da Confraría de Cangas e un orzamento de máis de 230.000 euros
Por Europa Press / Redacción | SANTIAGO DE COMPOSTELA | 24/05/2025 | Actualizada ás 15:37
A Consellería do Mar e o Consello Superior de Investigacións Científicas (CSIC) veñen de asinar un acordo de colaboración para poñer en marcha o proxecto RIFA, centrado na análise da resposta inmunolóxica da ameixa vermella fronte a factores ambientais. A investigación estará liderada polo Instituto de Investigacións Mariñas (IIM) do CSIC, con sede en Vigo, e desenvolverase en colaboración coa Confraría de Pescadores de Cangas.
O convenio foi asinado polo conselleiro do Mar, Alfonso Villares, e o vicepresidente do CSIC, Carlos Closa, e insírese dentro da Rede entre o sector pesqueiro e os organismos científicos de Galicia (Redemar). Segundo explicou Villares, o proxecto enmárcase na estratexia da Xunta de reforzar a investigación mariña como ferramenta clave para a toma de decisións no ámbito marisqueiro e para afrontar os desafíos derivados das novas condicións ambientais.
O estudo parte da análise de episodios de alta mortalidade da ameixa vermella rexistrados nos últimos anos, que mostraron unha relación con aumentos de temperatura e valores elevados de ondada, indicadores que poderían estar ligados ao impacto do cambio climático sobre os bivalvos. O obxectivo principal é determinar como afectan estes factores á capacidade de defensa da especie fronte a patóxenos, e identificar biomarcadores de tensión que poidan servir de alerta temperá ante riscos sanitarios.
Con financiamento do Fondo Europeo Marítimo, de Pesca e de Acuicultura, o proxecto dispón dun orzamento superior aos 230.000 euros e prolongará a súa actividade ata o ano 2027. Ao longo deste período, os investigadores analizarán a taxa de supervivencia da ameixa vermella en distintos escenarios ambientais e a súa resposta inmune a nivel celular e molecular, co fin de optimizar as condicións de extracción e colleita e garantir a sostibilidade da súa explotación.
A colaboración coa Confraría de Cangas permitirá aplicar os resultados de forma directa na xestión marisqueira local, e forma parte dun modelo de traballo conxunto entre administración, ciencia e sector produtivo que, segundo destacou Villares, "é esencial para avanzar cara a un marisqueo máis resiliente e informado".
