A Xunta recibe o traballo da Escola Galega da Paisaxe para a Guía de integración dos peches de Galicia

A Consellería de Medio Ambiente e Ordenación do Territorio recibiu o traballo elaborado pola Escola Galega da Paisaxe para a redacción da Guía de integración paisaxística dos peches de Galicia.

A directora do Instituto de Estudos do Territorio (IET), Inés Santé, mantivo un encontro coa directora da Escola Galega da Paisaxe, Isabel Aguirre, á que lle indicou que, a partir de agora, o IET analizará a totalidade dos documentos para integralos neste proxecto de protección da paisaxe.

A Xunta recordou que a Guía de peches de Galicia é un traballo que se leva a cabo en colaboración coa Fundación Juana de Vega, á que se destinou un presuposto de 40.000 euros, e que pretende dotar á Comunidade dunhas pautas para o peche de terreos no medio rural, congruentes coa rica tradición cultural.

En concreto, tratouse dunha investigación sobre os muros e os diversos sistemas de peche de parcelas no medio rural de Galicia, no que se estudaron as diversas tipoloxías de peche en relación co uso das terras.