Nueva Pescanova dá 'luz verde' á capitalización de créditos de entre 300 e 400 millóns

O consello de administración de Nueva Pescanova deu 'luz verde' este xoves á capitalización de créditos de entre 300 e 400 millóns de euros, ao tempo que aprobou o Plan Estratéxico da compañía ata 2020, que contempla investimentos por 125 millóns de euros.

O máximo órgano de dirección da pesqueira xa fora informado acerca da súa parte estratéxica, pero este xoves aprobouse formalmente tanto a parte estratéxica como o plan de viabilidade, a definición da cal estaba pendente dun acordo que posibilitase a ampliación de capital da compañía.

Precisamente, á vez que se aproba o plan estratéxico, o consello aprobou o inicio do proceso que desembocará na ampliación de capital de Nueva Pescanova. Neste sentido, a empresa alcanzou un acordo cos acredores e socios titulares do máis do 75% da débeda e do capital actual do grupo (La Caixa, Sabadell, Grupo Banco Popular, Abanca, BBVA, Bankia, Ubi, HSBC e SVP) para capitalizar parte dos seus créditos.

Deste xeito, Nueva Pescanova fortalecerá os seus recursos propios e reducirá considerablemente o seu endebedamento en torno a 300-400 millóns de euros. A cifra exacta establecerase en función da adhesión final dos acredores e socios á ampliación, na que Pescanova tamén terá a oportunidade de participar.

Esta ampliación permitirá acometer "con total confianza e garantías" os investimentos previstos no Plan Estratéxico por unha contía de 125 millóns de euros.

O presidente de Nueva Pescanova, Jacobo González-Robatto, resaltou que é unha "magnífica" noticia para a industria en Galicia e un voto de confianza ás máis de 12.000 persoas que forman o grupo e que fan posible co seu traballo que a compañía siga adiante nas súas actividades.

En concreto, segundo explicou, a compañía poderá proceder á necesaria renovación da flota pesqueira e modernización das plantas de produción, así como acometer a transformación das instalacións situadas no Grove nun centro tecnolóxico de I+D+i, o Pescanova BioMarine Center, que permita situar a Nueva Pescanova "na vangarda da investigación acuícola a nivel mundial, necesaria para o desenvolvemento do seu negocio".

"Quero agradecer o esforzo e a confianza dos principais acredores no futuro de Nueva Pescanova", resaltou González-Robatto.

Este acordo será sometido á homologación xudicial prevista no Real Decreto-lei 3/2009. De producirse a mesma, convocarase a xunta xeral de socios de Nueva Pescanova, onde se fará efectiva a ampliación de capital.

O Plan Estratéxico 2020 está condicionado á capitalización, que espera que conclúa no primeiro semestre do ano. O presuposto e os investimentos previstos para 2017 levaranse a cabo ao se aprobar xa, o pasado mes de decembro, o presuposto deste ano.