Coren desenvolverá novos produtos alimenticios para Xapón
A cooperativa ourensana investigará no campo dos produtos do ovo canda a Universidade de Kyoto. Xapón xa é un dos prinicipais destinos da carne máis selecta da empresa.
Por GC Emprende | Ourense | 23/01/2017 | Actualizada ás 10:55
O presidente de Coren, Manuel Gómez-Franqueira, e o científico xaponés Hajime Hatta, catedrático da Universidade de Kyoto, asinaron a semana pasada un acordo de colaboración para investigar e desenvolver novos produtos alimentarios a partir do ovo.
O mercado nipón xa é moi relevante para o agro en Ourense, especialmente para Coren. Os asiáticos consumen boa parte da carne de gama alta, sobre todo porcos alimentados con castañas. Este é un dos factores que explican a aposta de Coren polas plantacións destas árbores e agora o seu novo acordo coa Universidade de Kyoto.
Hajime Hatta é un referente internacional na investigación sobre o ovo e as súas aplicacións tanto nutritivas como farmacéuticas. É actualmente responsable do departamento de Alimentos e Nutrición da citada Universidade xaponesa e conta cunha dilatada experiencia en investigación sobre o ovo que iniciou desde a súa gradación como biólogo na Universidade de Osaka, hai xa 35 anos.
Xapón é o segundo consumidor mundial de ovos, por detrás de México, cun consumo anual per cápita de 330 ovos. En Europa, Francia é o maior consumidor, con 248 ovos per cápita ao ano, mentres que o consumo en España sitúase en 138 ovos anuais.
