Por Galicia Confidencial | Santiago de Compostela | 03/02/2017 | Actualizada ás 19:07
A Real Academia Galega (RAG) organiza a XXX edición dos Cursos de lingua e cultura galegas para persoas de fóra de Galicia en colaboración coa Secretaría Xeral de Política Lingüística da Xunta de Galicia, o Instituto da Lingua Galega da Universidade de Santiago de Compostela e a Deputación da Coruña. Desde 1988, esta iniciativa permitiu a máis de dúas mil seiscentas persoas chegadas desde os cinco continentes mergullárense no idioma e na realidade sociocultural de Galicia.
O programa diríxese a alumnado e profesorado universitario interesado na lingua, na literatura e na cultura galegas e, de maneira particular, ao vinculado aos centros de estudos galegos que existen en distintas partes do mundo, aínda que está aberto a calquera persoa maior de idade de fóra de Galicia.
A iniciativa constitúe unha ferramenta de grande utilidade para a internacionalización e normalización da nosa cultura: moitas das persoas que hoxe traballan no eido dos estudos galegos fóra de Galicia foron antes estudantes dos Cursos 'Galego sen fronteiras', informa a RAG.
Henrique Monteagudo, secretario da Real Academia Galega, e Xosé Luís Regueira, tamén membro de número da institución, codirixen os cursos, que se dividen en tres niveis nos que se combinan clases teóricas e prácticas, palestras impartidas por figuras destacadas da cultura galega e visitas a lugares de interese histórico e natural, entre outras actividades.
O prazo de recepción de solicitudes para participar nesta nova edición permanecerá aberto ata o 24 de febreiro. O programa desenvolverase en Santiago de Compostela do 3 ao 24 de xullo de 2017.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.