A OMIC da Coruña atendeu o ano pasado máis de 900 reclamacións, delas o 58% resoltas de forma favorable

A Oficina Municipal de Información ás Persoas Consumidoras (OMIC) da Coruña tramitou o ano pasado máis de 900 reclamacións por parte da cidadanía, das que o 58% resolvéronse de forma favorable, segundo informou o concelleiro de Emprego e Economía Social, Alberto Lema.

En concreto, segundo os datos presentados polo edil, a OMIC rexistrou 16.357 actuacións das que 15.455 foron de carácter informativo e de atención mentres que 902 casos derivaron en reclamacións contra empresas que foron tramitadas pola propia oficina municipal.

O edil mostrou a satisfacción do executivo municipal polo labor deste servizo, ao ser resoltas o 58% das reclamacións de forma favorable para os usuarios e as usuarias. Ademais, precisou que os acordos supuxeron a devolución de 114.252 euros a consumidores.

PRINCIPAIS QUEIXAS

En canto ás mediacións nas que non se chegou a un acordo coa empresa demandada pola persoa reclamente, a OMIC trasladou 192 expedientes ao Instituto Galego de Consumo ante posibles infraccións; 11 expedientes á Xunta Arbitral de Consumo; 41 á Axencia Estatal de Seguridade Aérea e 10 ao Servizo Provincial de Turismo.

Xunto á responsable da OMIC, Lidia Blanco, o edil explicou que a electricidade e as comunicacións representan o 56% das consultas e o 48% das reclamacións. Nun 28,27% teñen que ver con irregularidades na prestación dun servizo. Delas, un 25,61% tiveron que ver coa facturación e un 16% coas garantías.