Cuíña: "eu son absolutamente fiel ao PPdeG"

Nunha conversa con GC, este destacado militante popular de Lalín quere deixar moi claro que, a pesar da súa incorporación no Instituto Galego de Estudios Europeos e Autonómicos  (Igea), manterase "absolutamente fiel" ao PPdeG. "O meu proxecto segue sendo o do Partido Popular", asegura. E para que quede claro bota man dos sentimentos; "prometinlle ao meu pai en vida, cando estaba cabreado con algunhas cousas, que me ía manter fiel ao partido e así será, cando menso, agora".

"Eu quero impulsar o galeguismo en Galicia", asegura Cuiña para explicar o seu ingreso neste organismo que segundo el "non ten ningún carácter político".  Así, compara a súa presencia neste órgano coa de outros dirixentes políticos como Miguel Barros, histórico dirixente socialista en Vigo e conselleiro delegado de A Nosa Terra, hoxe afastado da política. "No Igea hai diferentes persoas de diferentes terreos políticos", apunta.

"Facer país"

Con todo, é consciente que a súa incorporación ao que algúns coñecen como o "chiringuito" de Quintana pode non ser ben entendido. Por iso aclara que quere axudar a "construir país" e suliña que se se lle tivera plantexado como un proxecto do BNG "non entraría".

"Plantexoumo Anxo Quintana, a quen llo agradezo, e me dixo que é un grupo de pensamento galeguista e non só do BNG. A min interesoume porque trátase de facer país e decidín entrar sempre e cando quede claro que istonon é algo político", insiste.

"Pero sabe que isto vai ser interpretado en clave política?", insistimos. "Quen faga iso o fai por descoñecemento", resposta e repite que no Igea hai xente do PSOE, como Miguel Barros ou Daniel Barata, do Consello de Contas de Galicia. "Somos diferentes persoas de diferentes terreos políticos". E volve insistir que o seu proxecto político está no PPdeG.