Bombeiros censuran a "obsesión" de Natutecnia con "negarlles formación"

Bombeiros dos parques comarcais que xestiona Natutecnia censuraron este mércores a "obsesión" desta empresa con "negarlles formación" aos seus traballadores.

Ata o punto, como denunciaron a través dun comunicado, de que a empresa "se nega a expedir o certificado para a validación da parte práctica" a aqueles profesionais que están a realizar o ciclo medio de Emerxencias e Protección Civil.

"Á empresa non lle custa absolutamente nada", reprobaron eses bombeiros, a quen a decisión de Natutecnia suponlles ter que facer 400 horas prácticas noutro centro.

Para eses empregados que se están formando, "esta política empresarial do pleistoceno, non acorde cos tempos actuais, é a que sempre tivo Natutecnia e da que nunca sairá". E pregúntanse se en realidade a súa obsesión é "facerlle a vida imposible aos seus traballadores".