A Coruña celebra este sábado a XXII edición do Día da Ciencia na Rúa

A Coruña acollerá este sábado a XXII edición do Día da Ciencia na Rúa, que se celebrará no Parque de Santa Margarita e que contará coa participación de 36 centros educativos, segundo informou o concelleiro de Culturas, Deporte e Coñecemento, José Manuel Sande.

Na presentación desta proposta, o responsable municipal destacou que nesta edición, como en anteriores, colabora a Universidade da Coruña (UDC). Ademais, dos 36 centros, seis son colexios de Educación primaria.

As actividades contan tamén coa colaboración de entidades e institucións como a Asociación de Amigos da Casa das Ciencias, cuxo presidente Francisco Javier Novelle, participou tamén na presentación.

Na iniciativa participará o Centro de Investigación Científica Avanzada, o Instituto de Investigación Biomédica e o Centro Oceanográfico da Coruña, entre outros. A eles, sumaranse entidades como a Agrupación Astronómica IO.