Fomento adxudica as obras do tramo Melide-Palas de Rei da autovía A-54 entre Lugo e Santiago

O Ministerio de Fomento adxudicou o contrato de obras do tramo entre Melide (A Coruña) e Palas de Rei (Lugo) da Autovía A-54, Lugo- Santiago de Compostela, por un importe de 70,87 millóns de euros.

Segundo indicou o Goberno central, esta nova autovía A-54 supón un "eixo importante para a vertebración" do interior de Galicia, xa que permitirá unir Lugo con Santiago de Compostela mediante unha vía de gran capacidade.

O tramo de autovía Melide-Palas de Rei discorre ao sur da estrada N-547, cun trazado sensiblemente paralelo a ela. Esta nova autovía incrementará a seguridade viaria da actual N-547 no seu conxunto e, ademais, de forma específica, eliminarase a travesía de Melide.

Coa adxudicación deste tramo e do próximo, correspondente ao tramo contiguo Arzúa-Melide, todo o trazado da autovía A-54 entre Lugo e Santiago estará proximamente en obras (entre Lavacolla e Palas de Rei) ou en servizo (entre Palas de Rei e Lugo e entre Santiago e Lavacolla).

A lonxitude deste novo tramo de autovía é de 11,7 quilómetros, que arrincan ao sur da localidade de Melide e continúan por Santiso cara a Palas de Rei, finalizando nas súas proximidades, onde se unirá con outro tramo xa en servizo.