SANTIAGO DE COMPOSTELA | 18/09/2017 | Actualizada ás 15:35 por EUROPA PRESS
A portavoz nacional do BNG, Ana Pontón, ratificou que este mércores unha delegación da súa formación desprazarase a Xenebra para presentar unha denuncia ante a ONU contra "o espolio do franquismo en Galicia" en relación ao Pazo de Meirás e a outros bens "roubados ao pobo galego", así como ante a "impunidade" contra a que "aínda actúa o franquismo no Estado".
En rolda de prensa, a preguntas dos medios, Pontón indicou que ela mesma encabezará a delegación que presentará a denuncia en Xenebra.
"Polo que significa o espolio do Pazo de Meirás que pagamos os galegos case a punta de pistola e tamén contra a impunidade do fascismo en España; porque é incrible que haxa persoas perseguidas pola súa opinión, por defender a democracia e, ao mesmo tempo, se permita a exaltación do fascismo sen que haxa ningún tipo de consecuencia", esgrimiu a dirixente nacionalista.
Non en balde, incidiu en que "como demócrata" provócalle "indignación" ver como o Estado español "fai a vista gorda" fronte á Fundación Francisco Franco, unha entidade "que fai exaltación dos crimes do franquismo".
"Chegou o momento de dicir xa abonda e nunca máis franquismo", aseverou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.