Feijóo destaca o traballo de Agasfra a favor do desenvolvemento das persoas con discapacidade intelectual

O presidente da Xunta, Alberto Núñez Feijóo, destacou este sábado en Vigo o labor da Asociación Galega San Francisco a favor do desenvolvemento das persoas con discapacidade intelectual, á vez que incidiu na importancia do traballo conxunto entre as administracións e a sociedade civil para seguir avanzando no ámbito social.

O máximo mandatario do Goberno galego felicitou aos socios, colaboradores e traballadores polo importante traballo que desempeñan na sociedade galega, así como por mellorar día a día a calidade de vida dos usuarios e das familias. En concreto, fíxoo este sábado pola mañá durante os actos con motivo do 50 aniversario de Agasfra, aos que tamén acudiron o conselleiro de Política Social, José Manuel Rey Varela; a presidenta da Deputación de Pontevedra, Carmela Silva; e o alcalde de Vigo, Abel Caballero.

"Con exemplos como o voso descubrimos que non importa tanto do que partamos como a meta á que podemos chegar", subliñou o presidente da Xunta xusto antes de reiterar o compromiso e o apoio da Administración galega a Agasfra a través da achega de 1,7 millóns de euros para o mantemento de prazas de residencia e de centros de día para persoas con discapacidade intelectual gravemente afectadas.

A Xunta tamén achegou a esta asociación unha partida de máis de 200.000 euros para a posta en marcha dun proxecto piloto de emprego personalizado para persoas con discapacidade intelectual.

CONCERTO SOCIAL

Así mesmo, para potenciar a coordinación entre os diferentes actores que traballan no ámbito social, Feijóo lembrou os dous instrumentos creados: o concerto social, para impulsar as relacións entre a administración e as entidades e ofrecer seguridade; e o acordo marco que xorde coa vontade de atender a libre elección da persoa destinataria dos servizos ou prestacións.

O presidente do Goberno galego concluíu subliñando que, na cidade de Vigo, a Xunta destina 40 millóns de euros a políticas sociais, nos cales se atopan seis millóns de euros anuais para financiar 600 prazas de discapacidade.

"Todo iso co obxectivo de que ningún vigués teña que saír da súa cidade para ter estes servizos", remarcou, xusto antes de engadir que o Diario Oficial de Galicia (DOG) acaba de publicar a creación de 25 novas prazas residenciais na contorna de Vigo e a súa área de influencia para as que a Xunta destinará un importe de 449.280 euros.