O xuíz De la Mata impón unha fianza de 80 millóns de euros á ex-cúpula de Caixanova

O xuíz da Audiencia Nacional José de la Mata impuxo o pagamento dunha fianza de 80 millóns de euros ao ex-presidente de Caixanova Julio Fernández Gayoso e outros sete acusados no caso 'Alfageme' polo prexuízo causado á caixa extinta ao conceder preto de 135 millóns de euros en créditos a unha promotora para a compra da conserveira, pola súa proximidade cos xestores da mesma.

No auto, o titular do Xulgado Central de Instrución número 5 expón que esta é a cantidade que se corresponde cos prexuízos sufridos por Caixanova en relación coas operacións financeiras que levaron a cabo entre os anos 2005 e 2009 e advirte de que, se no prazo de cinco días non abonan dita caución, procederase a embargar os bens dos acusados até cubrir a cantidade estipulada.

O xuíz acorda esta medida despois de tomar declaración entre luns e martes aos oito investigados. Trátase do ex-presidente da caixa galega Julio Fernández Gayoso; o ex-director José Luís Pego Alonso; o ex-directivo Gregorio Gorriarán; o que fora subdirector xeral de Caixanova Domingo González; o ex-director xeral da oficina principal da entidade José Benito Parente; o administrador da promotora Promalar Juan Lago Pérez e os tasadores Manuel Ardid e Manuel Asende. Todos eles son investigados polo delito de administración desleal e branqueo de capitais.

Os feitos remóntanse a outono de 2005, cando Gorriarán, xunto con Benito Parente, visitaron ao administrador de Promalar e propuxéronlle outorgarlle financiamento para que comprase Alfageme, dado que tiñan intereses na mesma Guillermo Alonso Jáudenes (xa falecido) e Fernando García, ex-presidente e ex-conselleiro da caixa galega, respectivamente. O obxectivo era beneficiar a estes accionistas na súa saída da conserveira e para iso simularon contratos que ocultaban a verdadeira finalidade do financiamento a Promalar, que acabou entrando en creba.

O maxistrado expón que levaron a cabo catro operacións; as dúas primeiras consistiron nun préstamo hipotecario de 60 millóns de euros e un crédito da mesma cantidade. En 2007 concedeuse un novo préstamo hipotecario de 9,25 millóns de euros e dous anos despois unha póliza de crédito de 5 millóns de euros.

NON É UNHA MEDIDA PREMATURA

Desagregado, o prexuízo causado a Caixanova é de 64,86 millóns euros pola falta de pagamento da póliza do crédito concedido, de 6,03 millóns pola resolución do contrato coa promotora e de 9,66 millóns polo préstamo hipotecario; en total 80,56 millóns de euros que corresponderían a Novacaixagalicia, entidade que naceu do proceso de fusión de Caixanova con Caixa Galicia.

No seu auto, o xuíz ten en conta a gravidade e complexidade dos feitos, a duración temporal da causa e a contía das responsabilidades. Ademais, expón que non se trata dunha medida "precipitada ou prematura".

Para tres dos investigados nesta causa --Pego Alonso, Gorriarán Laza e Fernández Gayoso-- trátase dun novo proceso xudicial relacionado coa súa xestión na caixa, xa que foron condenados a dous anos de cárcere cada un por este mesmo órgano en relación co cobro de indemnizacións millonarias que se concederon a si mesmos antes de abandonar a entidade e que alcanzaron os 22 millóns de euros.