Por E.P. | SANTIAGO DE COMPOSTELA | 14/12/2017 | Actualizada ás 13:49
Galicia perdeu un total de 6.554 habitantes no seis primeiros meses de 2017, xa que nin os nacementos nin a inmigración serviron para paliar o número de falecementos nin compensar a saída de poboación aínda que o saldo migratorio é favorable á Comunidade galega.
Segundo se desprende dos datos do Instituto Nacional de Estatística (INE) difundidos este xoves, a 1 de xullo de 2017 Galicia sumou 2.703.662 habitantes, o que significa 6.554 menos que o 1 de xaneiro do ano anterior, o que significa un -0,24%.
Isto sitúa o noso país como a quinta Comunidade de todo o Estado en perda de poboación durante o primeiros seis meses do ano, superada por Castela e León (-0,50%), Estremadura (-0,43%), Asturias (-0,41%) e Castela-A Mancha (-0,30%).
Se se toma como referencia os movementos migratorios (saídas e chegadas de poboación), Galicia conta cun saldo positivo, após gañar 2.087 habitantes no primeiros seis meses.
En detalle, as saídas de fóra Galicia a outros países están compensadas pola chegada de habitantes de fóra de España, o que significa que Galicia gañou 2.087 persoas. Con todo, hai máis galegos que van a outras comunidades autónomas que persoas que veñen aquí procedentes do Estado; concretamente, perdéronse 699 habitantes.
Ademais, Galicia rexistra máis defuncións que nacementos, de maneira que o saldo vexetativo é negativo en 7.942 persoas neste primeiro semestre do ano, conforme aos datos do INE.
DATOS ESTATAIS
No conxunto do Estado, a poboación aumentou en 21.021 persoas durante a primeira metade do ano e situouse nos 46.549.045 habitantes a 1 de xullo. O número de estranxeiros creceu un 1% até situarse nos 4.464.997.
Durante o primeiro semestre do ano, España rexistrou un saldo migratorio positivo de 52.926 persoas, consecuencia dunha inmigración de 237.115 e unha emigración de 184.189.
No caso dos españois, o saldo migratorio foi negativo e perdéronse 12.976 persoas. Mentres, a poboación estranxeira tivo un saldo migratorio positivo, de 65.902 persoas, o que continúa a tendencia de 2015.
As comunidades con maior crecemento poboacional son, en termos relativos, Illas Baleares (0,84%), Comunidade de Madrid (0,46%) e Canarias (0,43%).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.