O capitán do barco galego apresado asegura que "en todo momento" estivo fóra de augas arxentinas

O capitán do barco 'Playa Pesmar Uno', con base en Marín (Pontevedra), asegura que "en todo momento" o buque "estivo fóra de augas arxentinas" despois de que gardacostas da Prefectura Naval deste país suramericano interceptasen á embarcación por considerar que faenaba na Zona Económica Exclusiva de Arxentina (até 200 millas desde a costa). Así o dixo o presidente da Cooperativa de Armadores de Vigo (ARVI), Javier Touza, quen estivo en contacto coa empresa.

A armadora do buque é Pesquerías Marinenses, que se integra no Grupo Pesmar (que tamén conta con comercializadoras de peixe e frigoríficos).

Javier Touza sinala que a empresa propietaria do barco é "histórica", co seu porto base en Marín, e a súa frota está integrada en ARVI, onde "leva máis de 30 anos".

No tocante aos 34 tripulantes que leva a bordo, a empresa sinalou que "se atopan en bo estado", "máis aló da inquietude e incerteza", e que "a maioría" son galegos, incluído o capitán. Navegan escoltados por autoridades arxentinas para tomar terra na rexión de Comodoro Rivadavia.

Pola súa banda, o presidente de ARVI sinala que "debe primar sempre a presunción de inocencia", pois "serán as autoridades xudiciais as que teñan que determinar as responsabilidades".

Arxentina asegura que este pesqueiro se atopaba faenando "ilegalmente" en augas exclusivas do seu país. No pasado, outros barcos galegos tamén foron capturados por este motivo, como lle ocorreu ao 'Piscator' en 2013, un pesqueiro con base en Bueu que permaneceu 20 días retido e foi liberado co pago dunha multa.

"ENORME" CONCENTRACIÓN DE BUQUES NESTA ÉPOCA

O 'Playa Pesmar Uno' asegura que se atopaba na coñecida como milla 201, preto de Malvinas pero en augas internacionais, "xusto onde acaba a Zona Económica Exclusiva de Arxentina", onde neste momento "están concentrados uns 400 buques", principalmente de nacionalidade asiática.

Nesta época do ano "atópase unha enorme concentración" de barcos pesqueiros pola presenza dun cefalópodo chamado pota, parecido á lura, que "é moi estacional". Esta especie "é migratoria" e nestes días comeza ter máis tamaño mentres "sae de augas arxentinas a augas internacionais", indica Touza. De forma accesoria tamén se pescan especies como por exemplo a pescada.

Así, "existe unha gran tensión na zona", polo que "as autoridades arxentinas realizan un seguimento moi próximo para vixiar que non se entre nas súas augas".

A CAIXA AZUL SERÁ CLAVE

Nesta liña, Touza remarca que a caixa azul do barco será clave neste caso, xa que se trata dun sistema satelital que monotoriza en "cada momento" a posición do buque. Por iso, subliña que "as responsabilidades ou non se verán en función dos datos que arroxe a caixa azul".

Sobre este extremo, cre que "é un indicio claro de colaboración coas autoridades pesqueiras que cando chegaron os gardacostas e se solicitou que parasen o barco e deixasen os aparellos na auga, así se fixo". Logo diso, "subiron a bordo inspectores da dirección nacional de pesca arxentina e deron instrución de ir a porto, que cumpriron en todo momento".

Segundo explica, ante unha actuación que as autoridades arxentinas consideran "dubidosa" o procedemento é o de mandar parar o barco e envialo a terra para que "as autoridades administrativas e xudiciais se fagan cargo do tema", "comproban a carga a bordo e farán contraste dos posicionamentos exactos vía satélite" despois de que o barco saíse o 11 de xaneiro de Montevideo (Uruguai).