Nueva Pescanova non quere saber nada da vella Pescanova

O grupo Nueva Pescanova non quere saber nada co que lle está acontecendo á vella Pescanova (Pescanova SA), logo de que varios dos seus ex directivos, entre eles o ex presidente,  Manuel Fernández Sousa. “O auto da Audiencia Nacional imputa a varios exdirectivos da Vella Pescanova (Pescanova SA), que non teñen e nunca tiveron ningunha relación laboral co Grupo Nueva Pescanova”, apuntan desde a nova factoría. Con todo, Fernández de Sousa é o principal accionista do novo grupo, co 7,5% de accións, aínda que embargadas pola xustiza.

Así e, “co obxecto de evitar calquera posible confusión, conscientes do dano que a celebración dos xuízos a exdirectivos do equipo de Pescanova SA pode ter na imaxe da marca Pescanova”, os xestores do grupo resultante insisten en que non teñen nada que ver co anterior grupo ou propietarios.  “Ningunha das persoas imputadas ten relación laboral ou doutro tipo co Grupo Nuevava Pescanova. Ningunha das compañías do Grupo Nova Pescanova, nin os seus directivos, nin os seus traballadores, están imputados, investigados ou procesados no procedemento penal”, insiste nun comunicado. 

“O Grupo Nueva Pescanova naceu en novembro de 2015 tras o concurso de acredores da vella Pescanova (Pescanova SA) e é a nova sociedade titular do negocio da antiga Pescanova, con todos os seus activos e medios materiais e persoais”, sinala pero insiste en que non está relacionado co auto de procesamento que fixo público hoxe a Audiencia Nacional contra a vella Pescanova, e algúns dos seus directivos e administradores.

Procesamento

Precisamente, o maxistrado da Audiencia Nacional José de la Mata considera que hai indicios para xulgar ao expresidente de Pescanova Manuel Fernández Sousa e outras 18 persoas integrantes da excúpula da empresa polos delitos de falseamento de contas anuais e información económica financeira, estafa, alzamento de bens, branqueo, insolvencia punible, falsidade en documento mercantil, uso de información relevante e impedimento da actuación do organismo superior.

O xuíz pon fin a cinco anos de instrución e dita auto de procedemento abreviado ao considerar que deben ser xulgadas 19 persoas e 12 sociedades, entre elas a propia Pescanova S.A, por maquillar os estados financeiros da pesqueira entre os anos 2009 e 2012 mediante "prácticas contables irregulares".

De acordo co relato dos feitos que fai o maxistrado, os acusados alteraron as contas que presentaban ao mercado para evitar que as consecuencias destes movementos quedasen rexistradas na súa contabilidade e co fin de que non se visen reflectidas nas contas que logo presentan ante a Comisión Nacional do Mercado de Valores (CNMV).