As enfermeiras viguesas terán vacacións cando o Sergas queira
O xerente da Área Sanitaria de Vigo, Félix Rubial, volve estar no centro da polémica. O SATSE di que a xerencia da área sanitaria impuxo "de xeito unilateral" as libranzas e anuncia que impugnará esta decisión.
Por Galicia Confidencial | Vigo | 12/02/2018 | Actualizada ás 08:35
A Xerencia da área sanitaria de Vigo impuxo "de xeito unilateral" as libranzas do sector de enfermería. Así o denunciou o Sindicato de Enfermaría, SATSE, que estuda xa posibilidade de impugnar as instrucións de vacacións permisos e licenzas de 2018. E no centro desta polémica está Félix Rubial, que xa fora investigado pola xustiza polas mortes relacionadas pola Hepatite C.
Nun comunicado, este sindicato amosa a súa "indignación e o alto grao de malestar existente entre os profesionais polo novo documento imposto pola xerencia" e asinado polo doutor Félix Rubial "facendo caso omiso aos representantes dos traballadores que presentamos 16 alegacións ao devandito documento".
O Sergas alegou "falta de persoal nas listas de contratación" para "impoñer" as quendas de vacacións. Un argumento que rexeita o SATSE que advirte que hai centos de enfermeiros nestas listas, que están a esperar que a responsable da área Sanitaria de Vigo empece a xestionar os seus contratos "de maneira efectiva, con programación suficiente nos chamamentos e pensando na calidade asistencial, e non precarizando aínda máis a man de obra profesional".
Por este motivo, o Sindicato de Enfermaría impugnará o decreto tanto "pola súa forma de elaboración, como por limitar os dereitos dos enfermeiros a poder elixir libremente as súas vacacións, días de libre disposición, días adicionais, permisos sen soldo ou formación en determinados períodos, dereitos algúns destes recolleitos no Estatuto Marco do persoal estatutario".
