O alcalde de Santiago denunciará as ameazas de morte que recibiu

O Concello de Santiago mantén unha "relación fluída" co Arcebispado e o deán da Catedral a pesar da polémica aberta após o pregón do Entroido. Así o indicou este venres o alcalde compostelán, Martiño Noriega, que cre que a polémica forma parte dunha "campaña interesada" e avanzou que nos próximos días trasladará ás forzas da orde as ameazas (algunhas delas "de morte") recibidas a través das redes sociais contra a súa persoa e a súa contorna familiar.

O alcalde de Santiago, Martiño Noriega

"Hoxe chamei ao delegado do Goberno pero non puiden falar con el. Seguramente a semana que vén poña en coñecemento dos corpos de seguridade todo o material recollido nas últimas horas", indicou Noriega, que o pasado xoves publicou nas súas redes sociais unha captura de pantalla con varias ameazas graves recibidas nas últimas horas por mor da repercusión que tivo o pregón pronunciado o pasado sábado polo dramaturgo e cómico Carlos Santiago.

Así, indicou que non se poden pasar por alto "este tipo de cuestións" que penatran no "terreo persoal" e nas que chegan a producirse "ameazas de morte", mesmo, á súa contorna familiar. "Non darlle importancia é darlle centralidade na sociedade a quen non a ten", apostilou.

No entanto, lembrou que xa en 2015 sufriu un episodio similar cando un veciño de Santiago vinculado a partidos de extrema dereita foi detido por ameazalo e perseguilo. A Fiscalía reclama dous anos de cárcere para este home. O xuízo estaba previsto que se celebrase "este mes de febreiro" pero que foi posposto a final de ano, segundo confirmou Noriega.

Así as cousas, descartou tomar medidas para garantir a súa seguridade e a da súa contorna porque, di, non está disposto "a renunciar" ao seu "espazo de liberdade porque outras persoas queren que renuncie". "Non o fixen en 2015 a pesar de que se me recomendou e non o vou a facer agora", engadiu.

Ameazas en Twitter a Martiño Noriega.

"RELACIÓNS CORDIAIS" COA IGREXA

Martiño Noriega asegurou que o consistorio que dirixe mantén "relacións cordiais" co Arcebispado de Santiago, que convocou este sábado un "acto de desagravio" ao Apóstolo Santiago e a Virxe do Pilar polo pregón do entroido compostelán.

Así, o alcalde expresou que "houbo comunicacións" do grupo de goberno coas instancias relixiosas da cidade e que "segue habendo sintonía máis aló de que poida haber un desencontro persoal".

"É unha relación que coidamos dentro do respecto muto. O arcebispado e o deán forman unha das catro patas da cidade coa universidade, o concello e a Xunta. A relación está blindada e seguireina mantendo de maneira regular", remarcou.

POLÉMICA "INTERESADA"

Para o rexedor, a polémica forma parte dunha "campaña interesada". "Non entro en que unha intervención transgresora poida ferir sensibilidades. O que digo é que non as fere de forma natural, féreas despois cunha campaña interesada", expresou.

E é que, como lembrou, non existe material audiovisual sobre as presuntas ofensas relixiosas vertidas polo humorista e dramaturgo Carlos Santiago no pregón. "É como o caso de Ricky Martin, todo o mundo sabía o que fixera e ninguén o viu", concluíu