Condolencias dos grupos e loito oficial no Parlamento polo falecemento do deputado do PP Carlos López Crespo

Todos os grupos parlamentarios representados no arco parlamentario autonómico trasladaron o seu pesar e condolencias aos familiares e amigos do exalcalde de Outes (A Coruña) e deputado do PPdeG Carlos López Crespo, quen faleceu vítima dunha enfermidade contra a que loitaba desde meses atrás.

Tamén o presidente do Parlamento galego, Miguel Santalices, compañeiro de partido de López Crespo, manifestou nun comunicado o seu pesar polo falecemento do deputado e anunciou que, este luns, desprazarase para trasladar persoalmente o seu pésame á familia do parlamentario e poñerse á súa disposición.

Santalices destacou o "intenso compromiso" de López Crespo en cada unha das responsabilidades institucionais que exerceu ao longo da súa vida política, na que "destacou pola súa vocación de servizo e a entrega sen límite na procura do ben común".

Do mesmo xeito, o Parlamento declarou loito oficial polo falecemento do deputado e, desde esta mañá, as bandeiras ondean a media hasta no Pazo do Hórreo en sinal de pesar.

"EXCELENTE PERSOA"

Na habitual rolda de prensa dos luns, na que lembrou algúns dos asuntos que se debaterán no pleno desta semana, o portavoz parlamentario do PPdeG, Pedro Puy, arrincou a súa intervención cun recordatorio para López Crespo, cuxo falecemento, subliñou, marcou a reunión de grupo previa á súa intervención.

Puy repasou a traxectoria política do veterano militante do PPdeG, quen foi alcalde de Outes durante máis de dúas décadas, entre 1995 e 2016, á vez que o definiu como "unha excelente persoa, das que crea grupo, sempre anima, está alegre e felicita".

"O Grupo acusa o golpe, vivimos moi de preto a enfermidade que lle custou a vida. Estamos afectados e botarémolo de menos", dixo Puy, quen trasladou as condolencias dos populares aos familiares e amigos de López Crespo.

O dirixente popular tamén explicou que tivo a oportunidade de falar cos tres portavoces na Cámara de En Marea, Luís Villares; PSdeG, Xoaquín Fernández Leiceaga; e BNG, Ana Pontón, os que lle trasladaron o pésame polo falecemento do parlamentario.

A todos eles, dado que este martes hai pleno, deulles as grazas polas "facilidades" que puxeron para poder axustar a orde do día e "acompañar" a López Crespo "na súa última viaxe".

CONDOLENCIAS

O resto de grupos tamén trasladaron formalmente as súas condolencias. Así, Villares transmitiu o "afecto" do seu Grupo aos populares, así como á familia do parlamentario falecido; e Pontón fixo o propio, á vez que enviou aos achegados de López Crespo, que estarán a pasar "un momento moi doloroso", unha "forte aperta".

O PSdeG emitiu un comunicado no que traslada as súas condolencias ao Grupo Popular pola "triste noticia" e tamén transmiten o seu "respecto e apoio" á familia, amigos e compañeiros do deputado e exrexidor de Outes.