O pleno da Deputación de Lugo debaterá propostas por 25 millóns para "mellorar a calidade de vida dos veciños"

O presidente da Deputación de Lugo, Darío Campos Conde, anunciou este xoves que o seu goberno levará ao pleno do próximo martes, 29 de marzo, propostas por un valor de máis de 25 millóns de euros para "mellorar a calidade de vida" dos veciños de toda a provincia.

En concreto, segundo informou a institución nun comunicado, 21 millóns estarán destinados a 307 obras para mellorar servizos públicos, financiar 200.000 horas de atención a domicilio profesional a maiores, xerar máis de 240 novos empregos e desenvolver 22 actividades culturais, 84 deportivas e 79 turísticas.

Campos tamén explicou que o farán a través do Plan Único 2018, co que a Deputación impulsa a administración electrónica e mantén os grupos de Protección Civil "após os recortes da Xunta", criticou.

Ademais, o goberno provincial proporá no pleno incorporar os outros 4,2 millóns de euros nos orzamentos de 2018. Deles, 2,3 millóns estarán previstos para novas actuacións nos municipios a maiores do Plan Único.

RPT E PAZO DOS DEPORTES

Así, Campos convidou á oposición a votar a favor da proposta de relación de postos de traballo (RPT) para "rectificar após darlle as costas aos traballadores da Deputación" o pasado marzo.

Así mesmo, o equipo de goberno levará ao pleno a aprobación definitiva da concesión demanial do Pazo Provincial dos Deportes de Lugo a favor do Club Baloncesto Breogán durante 30 anos.