A familia do párroco de Vilanova dos Infantes di que o arquivo do caso non é o último paso

A Sección Segunda da Audiencia Provincial de Ourense confirmou o auto de conclusión de sumario sen procesamiento ditado polo Xulgado de Instrución número 1 de Celanova no caso do crime do párroco de Vilanova dos Infantes. Segundo informou o Tribunal Superior de Xustiza de Galicia (TSXG), a Sala confirma desta maneira do sobresemento provisional da causa, ao entender que se practicaron "todas as dilixencias pertinentes para o esclarecemento dos feitos". A pesar diso, o xulgado de Instrución entendeu que non existen indicios suficientes para "poder dirixir a acusación contra sospeitoso algún".

O párroco de Vilanova dos Infantes Adolfo Enríquez Méndez foi asasinado en marzo de 2015 no transcurso dun roubo no que desapareceu a diminuta talla da Virxe do Cristal, unha das imaxes relixiosas máis pequenas do mundo. A pesar de que nun inicio foron detidos dous sospeitosos, a instrución non atopou probas suficientes para inculpalos e en xaneiro a xuíza de Celanova ditou un auto no que se sobreseía a causa. O portavoz da familia, José Manuel Enríquez, sobriño do párroco asasinado, asegurou que esperaban o sobresemento porque nunca tiveron "o mellor trato de colaboración, respecto, agarimo ou afecto" por parte da xuíza que instruíu o caso.

Así mesmo, sinalou un "comportamento singular" por parte da propia xuíza, "amplamente coñecido na comarca de Celanova", e dos fiscais que participaron. "Apelo a que a autoridade xudicial competente estude o comportamento singular nos órganos xudiciais e fiscais de determinados membros de ilustrísimos corpos", denunciou. "A familia creu na Xustiza, segue crendo no Estado de Dereito, pero non en determinados administradores da Xustiza neste país. Aprobar unha oposición, ás veces, non poder levar a estar en posesión dun cargo", reiterou.

TRABALLO DA GARDA CIVIL

José Manuel Enríquez recoñeceu o traballo da Guardia Civil, que puxo "todo o seu esforzo, sacrificio e traballo" para resolver o ocorrido, polo que a familia "segue crendo" no labor do corpo de seguridade por encima de todo, xa que "é o único" que teñen. Así mesmo, asegurou que seguirán colaborando con todas as institucións, "sobre todo, con aqueles que traballen e colaboren para o esclarecemento dos feitos e para que eses supostos angelitos, que hoxe están libres, algún día acaben onde teñen que acabar, onde acaban as alimañas, entre reixas".

O portavoz da familia reiterou que prefiren "un culpable na rúa que un inocente no cárcere, pero non supostos monaguillos que son como alimañas". "Cremos que as alimañas estarán onde teñan que estar no momento que teñan que estar", abundou. Finalmente, subliñou que se trata dun arquivo provisional, "non definitivo nin un peche xudicial, que nada implica que se paralice a investigación da Guardia Civil ou o mecanismo xudicial". "Recordo que este non é o último mecanismo xudicial. A Guardia Civil continúa traballando", concluíu.