Cooperativas Lácteas Unidas consolida unha facturación de 230 millóns de euros en 2017

Cooperativas Lácteas Unidas (CLUN) consolidou en 2017 unha facturación de 230 millóns de euros, nos que destacan os máis de 76 de Feiraco Lácteos e os preto de 28 de Acolat-Clesa, segundo se puxo de manifesto no seu I Encontro de Socios, celebrado este sábado en Santiago de Compostela, con máis de 700 participantes.

A cooperativa de segundo grao CLUN, que naceu en xaneiro de 2017 da integración de Feiraco, Os Irmandiños e Melisanto, conta con 3.500 socios de máis de 30 municipios do centro e norte de Galicia.

Segundo se resaltou no Encontro, o pasado ano transformou 160 millóns de litros e produciu 200.000 toneladas de alimentación animal. A súa cifra en investimentos ascendeu en 2017 a máis de 5,5 millóns de euros, en maquinaria de última xeración e melloras no Centro de Alimentación de Vacún de Ribadeo (CAVI), novos envases, sistemas de información e novas tecnoloxías, ademais de proxectos de I+D+i, como Cattlecare, Milkcoop, Tecopaga ou Gescarro.

No Encontro de Socios, o director xeral da cooperativa, José Luís Antuña, asegurou que Galicia ten condicións para consolidarse como a "principal potencia láctea de España con papel relevante na Unión Europea nun contexto de competencia aberta" e animou a buscar "masa crítica para crear alianzas que xeren valor".

Antuña, que agradeceu aos socios, familias, consello reitor, traballadores e técnicos o seu "inmenso esforzo colectivo", asegurou que CLUN está aberto "ao futuro, ao crecemento e á integración se ten sentido para a mellora".

"Ser máis grandes, innovadores, competitivos, rendibles e felices vivindo e traballando no campo e para o campo é a nosa meta", apuntou.

Pola súa banda, o presidente de CLUN, José Ángel Blanco, lembrou que se trata dun proxecto que suma a tres cooperativas de referencia en Galicia", e que marca o "camiño do cooperativismo do século XXI", contribuíndo a "fomentar o orgullo de pertenza ao medio rural e a estimular o traballo colectivo" dos socios.

"Somos o maior proxecto galego de integración cooperativa e estamos a facer as cousas ben como proban os recoñecementos que xa recibimos, froito do traballo, esforzo e implicación de todos vós", engadiu.

No encontro fixáronse tres grandes obxectivos estratéxicos: a integración dos servizos técnicos financeiros para alcanzar unha maior eficiencia dos custos de produción, a optimización das subministracións e agregar volume para mellorar a cadea de valor e contribuír ao seu estructuración.

CIFRAS E MARCAS

A súa actividade configúrase ao redor de tres grandes seccións produtivas. En primeiro lugar, a división de Servizos, que prové ao socio do que poida necesitar para a xestión eficiente da súa gandaría, desde apoio na xestión económica-financeira, asesoramento técnico, até servizos como xestoría administrativa e seguros, comercialización de carne, horta, maquinaria ou taller de reparacións.

En segundo lugar, de Subministracións, que proporciona ao socio os produtos necesarios para a súa actividade. E en terceiro lugar, a división de Lácteos, que produce, envasa e comercializa leite e derivados.

Desde CLUN destácase que o pasado ano a entidade foi a primeira láctea con envases con certificación de 'Carbón neutral', permitíndolle deixar de emitir ao redor de 1.650 toneladas de dióxido de carbono. CLUN destinou máis de 3 millóns de euros ao lanzamento destes novos envases.

A cooperativa comercializa produtos lácteos de Galicia baixo as marcas de Feiraco, leite Premium Únicla, iogures e sobremesas lácteas Clesa e os queixos Arquega.

No capítulo de internacionalización, o sueste asiático e o norte de África consolídanse como primeiros mercados exteriores e focalizan o eixo de crecemento da cooperativa.