Detidos o dono e un empregado dunha canteira de Carballeda de Avia por usar explosivos sen autorización
Imputouselles un delito de fabricación, tenencia e uso de material explosivo sen contar coa correspondente autorización.
Por E.P. | SANTIAGO DE COMPOSTELA | 17/07/2018 | Actualizada ás 10:20
O propietario dunha canteira situada no municipio ourensán de Carballeda de Avia e un empregado, ambos veciños de Ribadavia, foron detidos como presuntos autores dos delitos de fabricación, tenencia e uso de material explosivo sen contar coa correspondente autorización.
A Garda Civil de Ourense informou de que tivo coñecemento de que nunha canteira dedicada á extracción de pedra estaban a utilizarse explosivos sen autorización, polo que realizou varias vixilancias e o pasado sábado puido observar aos detidos mentres manipulaban pólvora de fabricación caseira.
Por iso, o corpo de seguridade procedeu á detención de ambos e á incautación de 1.400 gramos de pólvora. En concreto, os detidos son R.R.F., de 43 anos de idade e propietario da canteira, e O.V.A., de 25 anos e empregado.
CONTROL CONTINUO DAS CANTEIRAS
A finais do pasado mes de maio, unha devastadora explosión de material pirotécnico en Paramos, no municipio pontevedrés de Tui, rematou coa vida dun matrimonio de orixe marroquí e arrasou decenas de casas.
Por mor desa explosión, que mantén en prisión comunicada e sen fianza ao dono dunha pirotecnia clausurada e de almacéns clandestinos de material pirotécnico e explosivo, o presidente da Xunta, Alberto Núñez Feijóo, anunciou o encargo á Delegación do Goberno de realizar unha revisión "pormenorizada" de todas as pirotecnias autorizadas en Galicia e dos lugares tanto de manipulación como de almacenamento de explosivos.
No entanto, neste caso, segundo confirmaron a Europa Press fontes da Garda Civil de Ourense, estas detencións producíronse dentro do dispositivo ordinario de vixilancia "continua" das canteiras, que este corpo leva a cabo.
Así, estas fontes indicaron que, dentro da pauta diaria, persoal de intervencións de armas e explosivos "investiga todas as canteiras", pero ao ter coñecemento de que nesta de Carballeda de Avia podíanse estar a empregar explosivos de forma irregular, "realizouse unha investigación aparte e a vixilancia deu resultado".
