Lidia Senra reitera ao Consello de Europa a vulneración de dereitos por parte do Estado
A eurodiputada galega Lidia Senra trasladou nunha carta ao Consello de Europa "a situación de censura e ataque á liberdade de información que se está a padecer no Estado español".
Por Galicia Confidencial | Santiago de Compostela | 18/07/2018 | Actualizada ás 09:00
Represión social, vulneración dos dereitos á liberdade de expresión e información, situación nas prisións, incumprimento da Lei da Memoria Histórica, vulneración dos dereitos lingüísticos e dos símbolos de Galicia ou vulneración do dereito á folga. Estes son algúns dos aspectos destacados que a eurodiputada galega Lídia Senra vén de remitir nunha carta á nova Comisaria de Dereitos Humanos (DDHH) no Consello de Europa, Dunja Mijatovic. O obxectivo: facerlle chegar a súa "preocupación polos numerosos casos de vulneración de dereitos humanos e liberdades producidos no Estado español nos últimos anos".
Ademais, para proporcionar exemplos concretos, a eurodiputada galega do Grupo Confederal da Esquerda Unitaria Europea/Esquerda Verde Nórdica (GUE/NGL) achegou tamén un dossier entregado xa ao gabinete do anterior Comisario de DDHH do Consello. E foi así que, remitíndose a este primeiro contacto, a eurodipitada alertou á Comisaria que "dende entón os casos de serio risco para os dereitos humanos segueron a repetirse".
De feito, Senra denunciou no seu momento ante a Comisión Europea por medio dunha pregunta parlamentaria, que a organización internacional independente Freemuse revelou a través do seu informe anual ‘O Estado da liberdade artística 2018’ que o español é o Estado que máis artistas meteu na cadea (13), por diante de China (12) e Irán (9).
“O informe, silenciado polos medios de comunicación maioritarios, apunta que se están aproveitando as modificacións introducidas na lexislación antiterrorista no 2014 para atacar expresións artísticas acusándoas de apoloxía ou enaltecemento do terrorismo”, explica Senra a Mijatovic na súa misiva. Ademais, afondou, “neste clima de vulneración do dereito á libertade de expresión e de información, fai poucos días tivemos coñecemento de que a varias persoas presas no Estado español vetóuselle o acceso ao número 451 da revista La Directa”, medio de comunicación catalán con máis dunha década de historia e depósito legal.
“É absolutamente intolerábel que se restrinxa o dereito de calquera persoa a recibir un medio de comunicación. Esta reacción penso que exemplifica ben a situación de censura e ataque á liberdade de información que se está a padecer no Estado español, ben lonxe dos valores que a propia Unión Europea di defender”, sentenciou Serra.
