Anova asegura que o dereito a decidir é “irrenunciable” e aposta por evitar o “cruce de declaracións” en En Marea

O dereito a decidir de Galicia, tal e como o recollen os principios fundacionais de En Marea e o acordo de Mazarelos, é “irrenunciable”. O líder de Anova, Antón Sánchez, foi contundente con este punto que Podemos Galicia pretende renegociar se se redefine o espazo de En Marea tal e como busca a proposta de Compostela Aberta.

O deputado de En Marea e portavoz nacional de Anova, Antón Sánchez. EN MAREA

“Esa cuestión non está en discusión e tal e como está no documento orixinal de En Marea está ben”, asegurou Antón Sánchez este venres en rolda de prensa ao ser preguntado pola información adiantada por GC ante a posibilidade de que Podemos poida aproveitar a coxuntura creada por CA para tentar modificar este punto. “O dereito a decidir é fundamental para entender a soberanía de Galicia e é perfectamente compatible coa aposta da esquerda federal”, suliñou.

A preguntas de GC, Sánchez dixo que ese “non é o problema que se plantexa no espazo de unidade” de En Marea porque o dereito a decicir está xa recollido no Acordo de Mazarelos e tamén era algo que defendeu Alternativa Galega de Esquerda (AGE), desde o inicio.

“PESO ESPECÍFICO” DE PODEMOS

Sobre a posibilidade de que os partidos –Podemos, Anova e EU-- participen da refundación de En Marea segundo o seu “peso específico”, tal e como pedíu o pasado luns a líder de Podemos-Galicia, Carmen Santos, Sánchez suliñou que, agora, cando se está na fase de discusión da proposta de CA hai que “dialogar de forma positiva” e non entrar “nun cruce de acusacións”.  

“Sempre hai que apostar por priorizar os intereses da zente porque nós non somos un fin, senón unha ferramenta útil para trasladar os problemas da xente”, dixo. Sánchez insistiu en relanzar o “espazo da unidade popular” tal e como propón CA pero “buscando consensos” e “sumando esforzos e diálogo”. “Enrocarse non conduce a ningures”, sinalou.

SOBERANÍA

O líder de Anova compareceu ante os medios para dar conta dos actos desta formación no Día das Letras Galegas e destacou como prioridades da formación nacionalista o dereito a exercer a plena soberanía, a república e Galicia como nación. “Queremos a plena soberanía para mellorar as condicións de vida nun contexto no que Galicia está perdendo peso específico no estado”, dixo.

Por iso, reivindicou a “Galicia como nación” e República fronte a Monarquía. E, neste sentido, suliñou que os concellos son fundamentais para acadar un cambio de réxime e puxo como exemplo, os concellos do cambio como o da Coruña, Ferrol, Santiago, Teo, Manzaneda ou Val do Dubra, onde gobernan mareas municipalistas.

Anova realizará un acto o vindeiro 24 coa presencia de Dolors Sabater, ex elcaldesa de Badalona por Guanyem Badalona tras unha moción de censura apoiada por PP e PSOE e con María del Río, dirixente de Alternativa, formación integrada EH-Bildu.