O líder do PPdeG sobre a eutanasia e o aborto: “molesta que se ideoloxicen temas morais e se rachen consensos”
Feijóo matiza ao seu novo presidente, Pablo Casado, que aposta por volver a lei do aborto de 1985.
Por Galicia Confidencial | Compostela | 26/07/2018 | Actualizada ás 15:15
Alberto Núñez Feijóo amosou este xoves a primeira gran fisura co presidente do seu partido, Pablo Casado, en temas tan delicados como a eutanasia ou o aborto. “O que si estamos maioritariamente dacordo no PP é que non se deben rachar consensos en asuntos tan sensibles”, dixo ao respecto.
Preguntado por Galicia Confidencial sobre a decisión de Casado de volver a endurecer o aborto e a eutanasia, Feijóo foi contundente. “Se non hai un consenso que substitúa o anterior o lóxico é que non se adopten medidas unilaterais”, suliñou.
En todo caso, dixo entender que haxa “sensibilidades” dentro do seu partido que sobre esta cuestión teñan ideas diferentes. “Todo é opinable. É perfectamente posible que dentro dun partido, un militante non teña a mesma opinión sobre eses temas”, dixo. “Pero tamén entendo que no meu partido debe haber liberdade de voto en conciencia sobre determinados temas”, engadiu.
“O que nos molesta é que se ideoloxice temas morais, temas éticos e que se rachen consensos previos porque na política estamos para unir, non para dividir”, concluíu.
