Por E.P. | SANTIAGO DE COMPOSTELA | 07/08/2018 | Actualizada ás 16:11
A Agrupación de Tráfico da Garda Civil realizou durante o operativo especial da Festa do Albariño 2.906 probas de alcoholemia e drogas na rede viaria do termo municipal de Cambados (Pontevedra). Nestes controis detectáronse 160 condutores que deron positivo en alcol e outros 24 en drogas. No ámbito penal procedeuse á detención de dous condutores por conducir de forma neglixente e temeraria, instruíronse dilixencias xudiciais a outros dous por negarse a someterse a realizar as probas e a un terceiro por conducir tendo retirado o carné por perda de puntos.
Dos 160 condutores que deron resultado positivo nas probas de alcoholemia, 148 foron denunciados por vía administrativa. Aos outros doce instruíronselles dilixencias por superar a taxa de 0,60 miligramos por litro en aire expirado. Os axentes da Garda Civil tamén procederon á detención de dous condutores que trataron de eludir os controis de alcoholemia. Un deles adiantou na súa fuxida a outros vehículos pola beiravía e tentou sacar fóra da calzada ao vehículo oficial que o perseguía. O outro condutor quedou co seu coche no interior dunha leira ao saír da estrada.
BALANCE INSATISFACTORIO
Desde a Garda Civil de Tráfico considérase que "aínda que son unha minoría" os condutores que deron resultado positivo sobre o total dos que foron sometidos ás probas, "o balance non é satisfactorio, en canto aos resultados obtidos e derivados do consumo destas substancias psicoactivas, tendo en conta que o desexable para a seguridade viaria é formalizar o menor número de actuacións posibles derivadas do consumo destas sustancias". Dentro dos aspectos positivos, a Benemérita destaca a inexistencia de ningún sinistro grave nas vías interurbanas limítrofes a Cambados durante eses días.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.