O Concello de Barreiros "baliza" a zona onde se produciu un desprendemento de rochas

O alcalde de Barreiros, Alfonso Fuente Parga, asegurou que o Concello "balizou" e "puxo" sinais de advertencia na zona onde se produciu un desprendemento este domingo. En concreto, a caída dunha rocha dun trinta quilos de peso, producíase sobre as 13,00 horas nunha das covas situadas entre as praias de Lóngara e Curbeira.

"Nesa praia o que se fixo foi balizar, pór advertencias para que ninguén se achegue a esa zona. Vimos como se desprendían esas pedras dos cantís nunha zona onde hai unha serie de covas", describe. Fuente Parga non descarta que "se desprenda algunha (rocha) máis, aínda que non poden precisar cando vai pasar". "É unha zona como toda a costa de Barreiros, con sete quilómetros de risco porque onde hai cantís poden pasar esas cousas. Pomos advertencias para evitar que se vaia a ese lugar", manifesta.

Afortunadamente non houbo feridos. O alcalde de Barreiros deixou claro que eses posibles derrubamentos "xa os viña detectando durante o inverno", aínda que puntualiza que "é nestas datas cando hai máis afluencia de visitantes, incrementándose na praia entre Curbeira e Lóngara, que era de poucos usuarios e que agora está a ser de moita afluencia, co que a posibilidade dun accidente aumenta", alertou.

"CON ADVERTENCIAS E CARTEIS"

Fuente Parga confía que "con advertencias e carteis" se eviten situacións como a do domingo, deslizando, seguidamente, que "isto é igual que saír á estrada, saímos coa intención de non ter un accidente e podémonos atopar co accidente aínda que nós non queiramos".

Esfórzase en deixar claro que se están pondo "todas as medidas" por parte do Concello lucense, salientando que este foi "un accidente" no que non "houbo que lamentar danos". Advirte de que se trata de "covas moi visitadas e utilizadas polos nenos e polas familias para sacarse fotos, do mesmo xeito que ocorre nas Catedrais". "Todos os cantís das Cadedrais e de Barreiros sonatractivos e poden ocorrer estas cousas", repón finalmente.

E é que hai algúns meses, un episodio similar custoulle a vida a unha turista de 24 anos nas Catedrais logo de caerlle unha rocha cando visitaba este areal de Ribadeo.