Detidos en Vigo 7 membros dunha banda itinerante especializada en roubos de vivendas

Axentes da Policía Nacional detiveron en Vigo a sete persoas que integraban unha banda itinerante especializada en roubos de vivendas, como presuntos autores de varios roubos con forza, no marco da bautizada como 'Operación San Roque'.

Segundo informaron fontes policiais, a investigación iniciouse este mes de agosto, despois de que se detectou a presenza, en Galicia, dun coñecido membro dunha organización criminal dedicada aos roubos en vivendas por toda España. Así, iniciáronse as pescudas para tratar de localizalo. No transcurso das investigacións, comprobouse que esa persoa se relacionaba con outros 6 individuos, e que se hospedaban en diferentes establecementos hostaleiros de Vigo.

Así, estableceuse un operativo de vixilancia e púidose constatar que este grupo, con estrutura criminal, dedicábase a asaltar vivendas a calquera hora do día, aproveitando a ausencia dos moradores. Tamén se comprobou que os sospeitosos utilizaban dous vehículos para os seus desprazamentos.

MODUS OPERANDI

Para cometer os roubos, os ladróns violentaban as portas principais das vivendas, servíndose de palanquetas, 'picos de papagaio' ou desaparafusadores de grandes dimensións. Nalgúns casos, tamén accedían aos domicilios escalando por terrazas.Unha vez no interior, actuaban con gran rapidez rexistrando as vivendas e apoderándose, en poucos minutos, dos obxectos de valor, principalmente xoias e diñeiro en efectivo.

DETENCIÓN E INGRESO EN PRISIÓN

A Policía despregou un operativo para deter aos sospeitosos e, no rexistro dos coches, interviñeron varias xoias, ferramentas coas que cometían os roubos, así como máis de 3.000 euros en efectivo. A ese respecto, os investigadores puideron constatar que os efectos recuperados procedían de, polo menos, tres roubos. Os detidos foron postos a disposición da autoridade xudicial, que decretou o ingreso en prisión de todos eles.