PP e PSOE rexeitan debater a creación dunha comisión de investigación sobre O Marisquiño

PPdeG e PSdeG rexeitaron a convocatoria dun pleno extraordinario no Parlamento de Galicia para debater, entre outras cuestións, a creación dunha comisión de investigación sobre o derrube dun peirao durante o festival O Marisquiño de Vigo, o pasado 12 de agosto, no que resultaron feridas máis de 460 persoas.

Así, populares e socialistas votaron en contra da proposta presentada por En Marea e BNG, e que foi tratada este xoves na reunión da Deputación Permanente da Cámara galega. Os grupos propoñentes solicitaban a celebración dun pleno extraordinario para que comparecesen tanto o presidente Feijóo como o conselleiro de Sanidade, Jesús Vázquez Almuiña, así como para debater a creación dunha comisión de investigación que analizase as posibles responsabilidades políticas derivadas do suceso.

A negativa de PSdeG e PPdeG a convocar ese pleno suscitou as críticas da voceira nacionalista, Ana Pontón, quen lamentou o "espectáculo cutre" de ámbalas formacións e a "falta de respecto dos cidadáns e á democracia" por non querer abordar un accidente no que "fallou toda a lexislación e todos os controis".

Na mesma liña, o portavoz de En Marea, Luís Villares, reprochou a populares e socialistas que desperdiciasen unha "oportunidade" de "arroxar luz" sobre o ocorrido, porque "prefiren encubrirse mutuamente".

PETICIÓN DE PLENO

Durante as intervencións na reunión da Deputación Permanente, a portavoz do BNG apelou, sen éxito, á "conciencia" dos deputados e subliñou que a celebración dun pleno extraordinario sobre o accidente do Marisquiño "é o mínimo" que os responsables políticos poden facer para "dar a cara", como é a súa "obrigación" cando se produce un accidente nunha infraestrutura de titularidade pública.

Ademais, proclamou que ese pleno, en cuxo orde do día propuñan crear unha comisión de investigación, é unha "débeda" coas vítimas do sinistro, que "teñen dereito a ter respostas", e serviría para "paliar" en parte a "imaxe bochornosa" de PP e PSOE "botando balóns fóra".

Segundo Ana Pontón, o "problema" neste sinistro, é que "non hai un único maquinista" (en clara alusión ao accidente de Angrois), senón que varias administracións estiveron implicadas na cofinanciación do evento, na cesión de espazos, autorizacións para actividades, etc. "Por iso ten que ser o Parlamento no que investigue, e para tomar medidas para que non volva ocorrer", aseverou, á vez que expresou o seu desexo de que a investigación xudicial aberta sexa "rápida" e "sen interferencias".

Pola súa banda, o portavoz de En Marea, Luís Villares, defendeu a necesidade dun pleno extraordinario no Parlamento como unha "oportunidade política" para que Núñez Feijóo "pase de ser un presidente avergonzado" a un que ofreza explicacións verosímiles, como el mesmo reclamou horas despois do accidente.

Villares explicou que a implicación da administración autonómica no evento empeza coa aplicación dunha lei galega de espectáculos, pasando pola responsabilidade dun presidente do Porto nomeado pola Xunta, e acabando por un dispositivo sanitario no que "non se reforzaron as Urxencias do Hospital Álvaro Cunqueiro".

Ademais, tamén recalcou que a comisión de investigación "cumpre unha función que non pode cumprir a investigación xudicial", isto é, que depura responsabilidades políticas e pode propor medidas para que non se repita un accidente así no futuro.

REXEITAMENTO DE PSOE E PP

Pola súa banda, tanto PP como PSOE rexeitaron a convocatoria dese pleno argumentando, entre outras cousas, que debe respectarse a "autonomía local" nun asunto no que se ventilan competencias municipais e, en todo caso, estatais. Así o mantivo o deputado socialista Abel Losada quen, facéndose eco dos argumentos que sostén o goberno local de Vigo, lembrou que o accidente non foi un derrube dunha pasarela, senón o colapso dunha estrutura de formigón, "de uso estritamente portuario".

Losada, despois de criticar as diferentes versións do Porto --falando primeiro de fallo estrutural, logo de responsabilidade municipal e, finalmente, da responsabilidade da organización--, incidiu en que o Concello olívico "autoriza aquilo para o que se lle pide autorización" e lembrou que houbo unha reunión de seguridade previa á celebración do Marisquiño e "ninguén manifestou ningunha reserva".

Finalmente, o parlamentario do PSdeG expresou o seu rexeitamento á creación dunha comisión de investigación porque, segundo indicou, a misión deste tipo de órganos "non debe ser acumular frustracións". "Parecía que aprenderamos algo da comisión das caixas, pero non", sentenciou.

Mentres, a representante do PP, Teresa Egerique, proclamou que "non ten sentido" un pleno extraordinario cando o goberno galego "vai dar a cara" e cando a actuación da Xunta foi "impecable". O vicepresidente da Xunta, Alfonso Rueda, pediu a súa comparecencia no pleno da Cámara para abordar o accidente e, previsiblemente, farao na primeira sesión ordinaria de setembro (no pleno do 11 e 12).

Así, a deputada popular defendeu a coordinación "áxil e eficaz" do dispositivo sanitario despregado no accidente, e subliñou que a existencia dunha lei galega de espectáculos e o seu cumprimento é "a garantía" para que non volvan ocorrer sinistros así no futuro.

Egerique apostou por centrar o debate sobre O Marisquiño no ámbito local, e instoulle ao alcalde Abel Caballero a dar as oportunas explicacións no pleno municipal extraordinario convocado para o 5 de setembro. "Queremos ver esa elocuencia do alcalde teloneiro nos concertos, do 'dono' das Illas Cíes, da estrela televisiva, do que parecía que era o organizador do Marisquiño. Queremos escoitalo o 5 de setembro en Vigo", reclamou.