Por E.P. | VIGO | 03/09/2018 | Actualizada ás 14:26
En Marea insistiu este luns en que debe haber comisión de investigación no Parlamento de Galicia, "independentemente" de que a haxa ou non no Concello de Vigo, sobre o accidente do Marisquiño, e así o vai a solicitar na Cámara galega.Nunha rolda de prensa celebrada na cidade olívica, o portavoz de En Marea, Luís Villares, sinalou que non hai que "confiarse ao que faga unha administración distinta" e que debe existir unha comisión de investigación no Parlamento "tanto se hai comisión municipal coma se non".
Así respondeu Villares ante a precisión realizada nos últimos días polo PP, que se abriu á posibilidade de crear ese órgano de investigación política na Cámara no caso de que o goberno de Vigo non dea as explicacións oportunas. "Obras son amores", apuntou o portavoz de En Marea. A ese respecto, volveu a insistir en que "hai razóns máis que sobradas" para que o Parlamento de Galicia cree esa comisión. Así, lembrou que, neste accidente, entrou en xogo o cumprimento da lei autonómica de espectáculos, ou a actuación dun porto cuxo presidente é nomeado pola Xunta.
"ENCUBRIMENTO RECÍPROCO"
Por outra banda, Villares, tras volver criticar a "pinza PP-PSOE" e o "encubrimento recíproco" entre Porto e Concello, afirmou que as informacións que van coñecendo apuntan cara a responsabilidades compartidas. Así, lembrou que a Xunta ten competencias "inspectoras" sobre o cumprimento da lei de espectáculos e que o Porto tamén, como titular das infraestruturas onde se produciu o accidente.
Mentres, a deputada de En Marea no Congreso, Alexandra Fernández, lembrou que o seu grupo pediu a comparecencia na Cámara Baixa da presidenta de Portos do Estado, María Ornella, e do responsable do Porto de Vigo, Enrique López Veiga. "En calquera democracia normal darían explicacións por vontade propia", apuntou, e criticou que o presidente da terminal viguesa tente eludir responsabilidades trasladándoas á organización do festival "con tal de reter a súa cadeira".
PP E PSOE
A portavoz do PP de Vigo, Elena Muñoz, volveu a reclamar que o pleno municipal sobre O Marisquiño teña duración ilimitada para que o goberno local "explique con todo luxo de detalles por que non comprobou a seguridade" da zona portuaria onde se celebrou o concerto e recalcou que un pleno de 18 minutos é "unha falta de respecto ás 467 vítimas" porque sae "a dous segundos por cada ferido.
En resposta a esta cuestión, o concelleiro de Seguridade, Carlos López Font, reiterou que o Partido Popular pediu o pleno extraordinario con formato de moción. "Nós non podemos estar como eles, cambiando tempos e con falta de rigor, se se equivocaron que rectifiquen e pidan outro formato", selou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.