Por Galicia Confidencial | Santiago | 03/09/2018 | Actualizada ás 18:41
Lídia Senra presentou hoxe un total de 16 emendas ao proxecto final do informe sobre a proposta de Regulamento do Parlamento Europeo e do Consello, relativo á adaptación das obrigas de notificación no ámbito da política de medio ambiente. Varias das achegas rexistradas enfocáronse na Directiva 86/278/CEE, relativa á protección do medio ambiente e, en particular, dos solos, cando se utilizan lodos de depuradora na agricultura.
Senra é responsable no seguimento deste informe para todo o Grupo da Esquerda Verde Nórdica- Esquerda Unitaria Europea (GUE/NGL) dende a Comisión de Agricultura. Entre outras consideracións, a europarlamentaria galega subliñou coas súas emendas a necesidade dunha cooperación máis eficaz entre institucións comunitarias. Demandou tamén que a Comisión presente cada dous anos ao Parlamento Europeo e ao Consello propostas que garantan unha maior protección dos solos e do medio ambiente.
Sobre as pautas de emprego de lodos na actividade agrícola, ademais de lembrar a necesidade de respectar os prazos estipulados entre a aplicación dos lodos e o acondicionamento das leiras, Senra solicita a prohibición do emprego destes lodos nos cultivos hortícolas e de froitas durante o período de vexetación. Tamén demanda que calquera tipo de autorización para o emprego agrícola de lodos de ndepuradora estea supeditado á garantía de que as persoas usuarias dispoñan previamente dunha formación axeitada, avalada e supervisada polas administracións. “Pedimos que sexa necesario contar cun carné expedido pola administración competente”, concretou.
Ademais, a coordenadora do GUE/NGL na Comisión de Agricultura e Desenvolvemento Rural
incidiu coas súas emendas na necesidade de controlar a calidade dos alimentos resultantes: “É fundamental que, ademais de tódolos controis e precaucións previas, aqueles alimentos de orixe animal ou vexetal procedentes de chans onde se utilicen lodos de depuradora sexan sometidos a unha completa análise de residuos de metais pesados antes de proceder á súa comercialización”.
Asemade, na liña de apostar por ferramentas propias que permitan á Comisión Europea verificar o correcto cumprimento das directivas, a eurodeputada galega reiterou a pertinencia de que a Comisión Europea dispoña dos mecanismos precisos para realizar inspeccións, de xeito que conte con información propia para contrastar os datos facilitados polos Estados membro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.