Rey Varela anuncia que será candidato en Ferrol: "Decidín dar o paso para volver ser o voso alcalde"
Asegura ante un auditorio con 300 militantes e simpatizantes que o fai "coa mesma ilusión de fai dez anos, pero con moita máis experiencia"
Por E.P. | | 08/09/2018 | Actualizada ás 14:23
O presidente do PP de Ferrol e conselleiro de Política Social, José Manuel Rey Varela, anunciou este sábado que será o candidato dos populares na cidade naval nas municipais do próximo ano. "Decidín dar o paso e presentarme novamente á presidencia do Partido Popular de Ferrol para volver ser o voso alcalde", proclamou Rey Varela nun anuncio realizado no mediodía deste sábado nun acto de partido organizado nas instalacións dun hotel da cidade.
Ante un auditorio repleto, Rey Varela trasladou que se presenta para este cargo "coa mesma ilusión de hai dez anos, pero con moita máis experiencia", segundo di, "grazas ao presidente Feijóo" e a "todos" os seus compañeiros de partido. "Entrégome a Ferrol de cheo, sen reservas e sen segundas derivadas, sabendo moi ben o que supón este compromiso, nunha entrega na que dependo tan só dos ferroláns, e que o fago ademais co apoio e comprensión da miña familia", afirmou.
"Preséntome con toda a humildade e ilusión para iniciar unha nova etapa, cun equipo e proxecto que iremos construíndo nos próximos meses, co que iremos sumando con persoas ás que non miraremos a quen votan, xa que Ferrol necesítanos a todos", exclamou no seu discurso.
Nun discurso realizado ante uns 300 militantes e simpatizantes, mostrouse visiblemente emocionado en determinados momentos, como ao facer balance dos anos vividos e ao acordarse dalgúns dos alcaldes e concelleiros do PP de Ferrol xa falecidos.
"O futuro de Ferrol é dos ferroláns e non podemos permitir que nolo arrebaten coas batallitas partidarias ou con mentiras o que nos corresponde", deixou claro.
Todo iso, mentres Rey Varela segue como conselleiro de Política Social e á espera da remodelación de Goberno que está prevista no Executivo de Alberto Núñez Feijóo.
CONGRESO
No acto celebrado en Ferrol tamén se deron cita o secretario xeral do PPdeG, Miguel Tellado, e o presente provincial, Diego Calvo, ambos tamén ferroláns.
Alí, Rey Varela pediu respaldo aos militantes para que o apoien no congreso local do partido, fixado para o 22 de setembro. O habitual no PP é que o presidente local sexa o candidato.
Sostén que a súa decisión de presentarse é para "evitar que os ferroláns se teñan que ir da súa cidade en busca dunha oportunidade laboral, para lograr que Ferrol se integre na rede de cidades máis dinámicas do norte peninsular, coas súas potencialidades". Ademais, reclama que "Ferrol volva estar presente no mapa político de España e de Galicia, e non só polas leas".
Xunto a isto, Rey Varela asegurou que un dos motivos que lle levaron a dar "este paso" foron "os cidadáns". "Páranme pola rúa, de todos os partidos, non só do PP, e animábanme a presentarme", explica.
Finalmente, lanzou tamén unha mensaxe ao goberno local de que volve presentarse para pelexar pola Alcaldía. "Eu non volvo a Ferrol, é que eu nunca me fun, e por iso pídovos o voso apoio para seguir construíndo este gran partido e para pór a disposición dos veciños o mellor equipo e proxecto", sentenciou.
