Por Galicia Confidencial | A Coruña | 21/11/2018 | Actualizada ás 13:29
Alcaldes do PP na provincia da Coruña secundaron unha concentración ante a Deputación, a cuxo goberno --conformado por PSOE e BNG-- acusan de "roubar" 30,5 millóns aos concellos a través das partidas previstas no Plan Único.
Os representantes municipais, unha trintena, portaron cada un unha pancarta coa cantidade que, segundo o PP, deixará de percibir os seus concellos en 2019. Unha contía que o portavoz desta formación na Deputación da Coruña, Agustín Hernández, cifrou en 30,5 millóns no conxunto da provincia da Coruña.
A protesta tivo lugar nas escaleiras da Deputación, momentos antes da sesión plenaria para a aprobación do orzamento provincial para o próximo ano. "É ináudito que o orzamento diminúa un 19%", dixo sobre os investimentos fixados no citado plan. "Supomos que logo será trasladado aos concellos en función da cor política", apuntou Hernández ao ser preguntado sobre o posible destino da partida.
"MARCA" EN INVESTIMENTO, SEGUNDO O GOBERNO
Fronte ás súas denuncias, o presidente provincial, o socialista Valentín González Formoso, afirmou que "ningún concello vai recibir menos en investimento público neste mandato que no anterior", en alusión ao goberno provincial do PP, e retou aos alcaldes deste partido a facer "unha comparativa". Ademais, vinculou a protesta coas próximas eleccións municipais e defendeu que en 2019 baterase "marca de investimento público" nos municipios.
Por outra banda, requiriu á Xunta para que aplique o mesmo sistema que a institución provincial para a asignación de recursos. "Con carácter obxectivo e non con convocatorias que non son en concorrencia competitiva". "Que a Xunta acolla un sistema que vai dar protección a todos os concellos, independentemente da súa cor política", insistiu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.