A Xunta deféndese das palabras do alcalde de Santiago sobre a depuradora da Silvouta

A Xunta de Galicia contestou ás acusacións do alcalde de Santiago, Martiño Noriega, quen viu "mala fe" e "deslealdade" no presidente autonómico, Alberto Núñez Feijóo, ao cuestionar nunha reunión coa ministra para a Transición Ecolóxica, Teresa Ribera, a proposta de ampliar a estación depuradora da Silvouta, tras caer o proxecto do Souto.

Así, nun comunicado de prensa, despois dese encontro deste martes e da reacción do alcalde compostelán, a Xunta reiterou a "necesidade urxente de definir un proxecto viable que permita renovar o sistema de saneamento de Santiago e mellorar a calidade das augas do río Sar". Neste sentido, dixo que foi o que trasladou ao Goberno central.

Segundo a Xunta, o ministerio trasladou a Feijóo que a proposta do Concello de Santiago de ampliar a actual depuradora da Silvouta "carece aínda dos avais técnicos necesarios e, por tanto, non está confirmada a súa viabilidade". Así, di que o Goberno galego e o central "coincidiron na necesidade de celebrar canto antes un encontro a tres bandas coa finalidade de clarificar e desbloquear a situación".

"RODEADA DE INCERTEZA"

A Xunta considera que a ampliación da actual depuradora está "rodeada de incerteza", fronte á do Souto, que foi descartada polo Concello de Santiago pola oposición e que foi a que impulsou o goberno local do PP no seu día, cando tamén gobernaba este partido no veciño municipio de Ames.

Así as cousas, a Consellería de Infraestruturas, que este mandato municipal mantivo co Concello de Santiago varios tira e afrouxa en cuestións como a intermodal compostelá e a depuradora, reafirma no mesmo comunicado o seu "compromiso" coa cofinanciación das obras de mellora do sistema de saneamento "dentro do actual prazo de fondos europeos" e "urxe que se peche unha alternativa que constitúa un proxecto tecnicamente viable".

Neste sentido, apuntou que a "necesidade de definir un novo proxecto pon en risco a execución nos prazos establecidos dos fondos europeos consignados a esta actuación, complicando o seu financiamento".