O Sergas asegura que as dimisións dos xefes de servizo en Vigo non influirán na asistencia médica

As dimisións dos xefes de servizo de Atención Primaria en centros de saúde de Vigo "non van ter ningún tipo de repercusión asistencial", segundo explican dende o Sergas. A Dirección Asistencial "asumirá as decisións" con respecto ao "funcionamento ordinario" destes centros, cuxos xefes de servizo e de unidade de Atención Primaria presentaron a súa dimisión para protestar pola xestión do Servizo Galego de Saúde (Sergas). 

Así o manifestou este martes, en declaracións a Europa Press, o xerente da área sanitaria de Vigo, Félix Rubial, quen remarcou que estas dimisións en bloque non influirán de ningunha maneira a nivel de atención médica.  Respecto diso, lembrou que sete centros de saúde levan un ano sen xefatura na zona.

Por iso, insistiu nunha "mensaxe de tranquilidade" á poboación, en especial aos usuarios dos centros de saúde afectados. Sobre as dimisións, Félix Rubial recoñeceu que "esixen un sobreesforzo da Dirección Asistencial". "O máis importante non é a xestión da Dirección senón a execución do xa planificado", defendeu o xerente da área sanitaria.

"Non vai xerar caos nos centros", subliñou o xerente para matizar que os xefes dimisionarios "son médicos asistenciais que van seguir o seu labor" cos doentes. Por iso, considerou "temerario" pór "en dúbida" a asistencia nos centros de saúde sen xefe. A fío disto, reivindicou a "competencia extraordinaria" dos profesionais médicos. "Os propios doentes recoñéceno, ao ser o servizo mellor valorado pola accesibilidade", sentenciou.

AUTOCRÍTICA

Ante as dimisións en bloque, o xerente da área sanitaria viguesa admitiu que "hai toda unha serie de traballo por facer". Deste xeito, insistiu no Plan Estratéxico consensuado cos profesionais, incluídos os que dimitiron, e que "ten un horizonte até 2021".

"A Dirección asume toda a responsabilidade de levar a cabo todas estas melloras", subliñou Félix Rubial, quen puntualizou que "quere facelo de maneira colaborativa, tamén coas persoas dimisionarias". Volveu a apelar ao "diálogo" cos profesionais porque se trata dun traballo de "longo percorrido" para "reformular determinados aspectos".

"O Plan Estratéxico é dos profesionais, vai máis aló do equipo directivo", afirmou. Neste sentido, o xerente da área de Vigo insistiu en que "hai que evolucionar ao modelo asistencial sempre co diálogo e coa participación dos profesionais". Por iso, defendeu que os xefes dimisionarios "son parte da solución".