Un estudo sobre viñedo realizado na Evega, recoñecido nos premios de investigación en produción ecolóxica

Un estudo sobre viñedo ecolóxico realizado na Estación de Viticultura e Enoloxía de Galicia (Evega) e liderado por David Castrillo Cachón, recibiu o accésit dos XX Premios Nacionais en Investigación e Defensa da Produción Ecolóxica 'Andrés Núñez de Prado'.

Estes galardóns, outorgados na localidade cordobesa de Baena e organizados pola asociación Ecovalia, buscan recoñecer o labor dos profesionais que traballan en temas relacionados coa produción ecolóxica.

Diso informou a Consellería do Medio Rural nun comunicado, no que explica que entre os candidatos á modalidade de investigación, o xurado priorizou aqueles traballos que vinculasen este tipo de produción coa mitigación e adaptación ao cambio climático.

Neste sentido, o traballo 'Viñedo ecolóxico vs convencional: reservorio de biodiversidade de fermentos para a adaptación aos efectos do cambio climático e a tipicidad do viño', realizado na Evega conseguiu este recoñecemento especial.

CARACTERÍSTICAS DO TRABALLO

O departamento que dirixe José González destacou que o traballo consistiu nun estudo comparativo sobre a diversidade de fermentos en uvas e mostos de produción ecolóxica fronte á produción convencional en diferentes zonas de Galicia, así como a influencia sobre o perfil químico e sensorial dos viños.

Esta diversidade estudouse durante tres campañas consecutivas (2013-2015) nas variedades treixadura, albariño, mencía e brancellao. Así, identificáronse 46 especies distintas pertencentes a 22 xéneros.

A análise sensorial dos viños ecolóxicos comerciais de Galicia puxo de manifesto que este tipo de produción permite a obtención de caldos de calidade diferenciada.