O Goberno central anuncia un AVE que unirá Ourense con Madrid en "2 horas e 15 minutos"

O delegado do Goberno en Galicia, Javier Losada, avanzou este mércores "a próxima posta en marcha, durante o ano próximo", dunha liña de alta velocidade que permitirá a conexión de Ourense con Madrid "en apenas 2 horas e 15 minutos", con parada en Zamora.

Tren Ave | Fonte: renfe.es

Ademais, Losada celebrou o "desbloqueo de proxectos crave" na provincia de Ourense durante os sete primeiros meses de Pedro Sánchez á fronte do Executivo central. No seu balance, explicou que o Ministerio de Fomento investiu durante esta primeira etapa 13,1 millóns de euros nas estradas da provincia.

Unha das actuacións que destacou a Delegación do Goberno, nun comunicado de prensa, foi na autovía Lugo-Ourense (A-56), cuxo primeiro tramo, segundo revelou Javier Losada, "xa superou o 50% de execución e o seu final é inminente". Ademais, esta mesma vía ten o seu tramo Eirasvedras-Quintela, a denominada variante norte, co seu proxecto construtivo en redacción.

O delegado do Goberno subliñou tamén a importancia da circunvalación do Barco de Valdeorras. Trátase dun proxecto de conexión das estradas N-120 e N-536 dotado con 63,6 millóns de euros e xa aprobado polo Consello de Ministros. Outra licitación aprobada foi a do Museo Arqueolóxico de Ourense, cuxas obras estarán en marcha este ano con 12 millóns de euros.

OUTROS ASPECTOS

Javier Losada detallou, ademais, o compromiso do Executivo cos afectados polos incendios forestais de 2017, pois o Consello de Ministros desbloqueou as axudas coa inclusión de 1,5 millóns de euros nos Fondos de Continxencia.

Así mesmo, os municipios da provincia levan 167.500 euros para a loita contra a violencia de xénero e seis concellos da provincia reciben 1,5 millóns de euros para a rehabilitación de dez áreas con 469 vivendas, en concreto en Xunqueira de Ambía, Vilar de Santos, Ribadavia, Ourense, Celanova e Castro Caldelas.

Tamén Javier Losada incidiu na "importancia do eixo de xestión vinculado aos compromisos sociais e a recuperación de dereitos". Deste xeito, detallou que a subida das pensións exposta polo Goberno afecta a 108.000 pensionistas na provincia de Ourense, que verán un 1,6% máis de ingresos, que chegará a un 3% no caso das pensións mínimas.

Tamén a subida do Salario Mínimo Interprofesional dun 22% ata os 900 euros ao mes en 14 pagas beneficia a persoas da provincia, indicou. Neste caso, son unhas 12.000 persoas da provincia os que están por baixo das percepcións mínimas fixadas, concretou a Delegación do Goberno, que verán un incremento nas súas retribucións. Isto beneficia en especial a mulleres e a mozas, destacou o delegado.

Pola súa banda, os 24.000 autónomos da provincia de Ourense terán dereito a paro, baixas médicas e prestacións sociais tras o acordo asinado polo Goberno. Ademais, 23.500 empregados públicos verán un aumento nas súas retribucións de polo menos un 2,25%.

Outro colectivo que se beneficiará das medidas do Executivo é o de pais e nais, cunhas 12.000 persoas que terán dereito á devolución das retencións do IRPF realizadas entre os exercicios 2014 e 2017.