Suprimir 22 concellos e dúas deputacións en Galicia?
Que administracións habería que fusionar para aplicar o recorte italiano no país? GC avalía que concellos e deputacións poden suprimirse na próxima lexislatura no Estado e presenta as posturas dos diferentes partidos galegos.
Por Walter Burns | Ourense | 16/08/2011 | Actualizada ás 22:05
Suprimir as provincias de menos de 300.000 habitantes ou de 3.000 km2 de superficie, é dicir, e os concellos con menos de mil habitantes. Estas son algunhas das medidas anunciadas por Italia para calmar a ese anónimo ente chamado "os mercados", capaz de amedrentar a calquera goberno democraticamente elixido.
O anuncio de Silvio Berlusconi desatou de seguido un debate en España, estado cuxa solvencia tamén está en cuestión. Por exemplo, este martes o candidato do PSOE á presidencia do Goberno Alfredo Pérez Rubalcaba apostaba pola eliminación das deputacións, que en Galicia leva anos a demandar o BNG. Alfredo Pérez Rubalcaba argumenta que as provincias son produto do século XIX e que cómpre eliminalas ou redefinilas súas funcións.
O debate tamén chegou a Galicia. O presidente da FEGAMP, o socialista Carlos Fernández, alertou esta semana que moitos municipios poden quebrar se a Xunta non asume o pagamento de parte dos servizos municipais. Neste contexto, hai voces tanto no PSOE como no PP que falan da necesidade de fusionar concellos en Galicia. Agora ben, ninguén se atreve a concretar que concellos deberían ser eliminados.
De aplicarse o criterio italiano, Galicia perdería 22 concellos. Velaquí a lista de entidades que se poderían suprimir, segundo a súa provincia e ordenada por número de habitantes segundo provincias:
Ourense Blancos (Os) 997
Ourense Lobeira 994
Ourense Manzaneda 994
Ourense Vilar de Santos 970
Ourense Gomesende 968
Ourense Montederramo 961
Ourense Xunqueira de Espadanedo 948
Ourense Punxín 840
Lugo Muras 787
Lugo Triacastela 771
Ourense Quintela de Leirado 751
Pontevedra Mondariz-Balneario 734
Ourense San Xoán de Río 734
Ourense Vilariño de Conso 675
Ourense Parada de Sil 670
Lugo Ribeira de Piquín 664
Ourense Pontedeva 661
Ourense Chandrexa de Queixa 639
Ourense Larouco 584
Ourense Beade 515
Ourense Teixeira (A) 447
Lugo Negueira de Muñiz 207
Ademais, dúas provincias galegas, Ourense e Lugo estarían preto de seren suprimidas de acordo ao baremo italiano. Ourense ten 336.000 habitantes e Lugo 355.000. De confirmarse a continúa caída demográfica, pronto entrarían nas administracións a fusionar.
Baltar gasta máis do 40% do que ingresa en soldos
A Deputación de Ourense, en mans do PPdeG ten 851 empregados directos, o que a converte no maior empregador da provincia. Segundo denunciaron a oposición e multitude de medios, a maioría destes traballadores son cargos do partido conservador ou familiares seus. O ente que dirixe José Luís Baltar adica máis do 40 por cento dos seus ingresos a pagar aos seus asalariados, mentres que na Coruña non se chega ao 18 por cento.
O caso da Deputación de Ourense pode ser o máis extremo, pero non é o único nun país no que as contratacións públicas a miúdo soen executarse en función das afinidades políticas. As palabras de Rubalcaba mostran que tanto pequenos concellos como os entes provinciais poden ter os seus días contados. O novo presidente da Deputación da Coruña, Diego Calvo (PP), xa se mostrou a prol da fusión dos municipios pequenos sempre que sexa por vontade propia malia que, loxicamente, está en contra da fin das deputacións.
Con todo, hai algo sobre o que ningún político se atreve a pronunciarse, o futuro dos funcionarios que fiquen sen labor no caso de extinguirse as súas administracións.
